Read Елизаветинская Библия, 1751 Сирах 21 Bible Online

Сирах 21 - Елизаветинская Библия, 1751 bible

Сирах 21

¹Чадо, согрешил ли еси, не приложи ктому, и о преждних твоих помолися.

²Якоже от лица змиина, бежи от греха: аще бо приступиши к нему, угрызнет тя:

³зубы львовы зубы его, убивающии душы человечи.

⁴Яко мечь обоюду остр всяко беззаконие, ране его несть изцеления.

⁵Прещение и досаждение опустошат богатство: тако и дом гордых запустеет.

⁶Моление нищаго из уст до ушию его, и суд его со тщанием грядет.

⁷Ненавидяй обличения последует грешнику, и бояйся Господа обратится сердцем.

⁸Познан есть издалеча сильный языком, и разумивый весть, егда поползается.

⁹Созидаяй дом свой имением чуждим, якоже собираяй камение на гроб себе.

¹⁰Изгребия собрана соборище беззаконников, и кончина их пламень огнен.

¹¹Путь грешников углажден от камения, а на последок его ров адов.

¹²Сохраняяй закон содержит помышление свое,

¹³и совершение страха Господня премудрость.

¹⁴Не накажется, иже не есть коварен:

¹⁵есть бо коварство умножающее горесть.

¹⁶Разум премудраго яко потоп умножится, и совет его яко источник живота.

¹⁷Утроба буяго яко сосуд сокрушен и всякаго разума не удержит.

¹⁸Слово премудро аще услышит разумный, восхвалит е и к нему приложит: услыша е буй, и не угодно ему бысть, и обрати е за плещы своя.

¹⁹Повесть буяго яко бремя на пути: во устнах же разумнаго обрящется благодать.

²⁰Уста премудраго взыщутся в собрании, и словеса его размышлена будут в сердцы.

²¹Якоже дом разорен, тако буяго премудрость, и разум неразумнаго неиспытны глаголы.

²²Пута на ногах неразумевающым наказания, и яко ручнии оковы на руце десней.

²³Буй во смехе возносит глас свой, муж же разумный едва тихо осклабится.

²⁴Якоже утварь златая мудрому наказание, и якоже обручь на десней мышце его.

²⁵Нога буяго скора в дом, человек же многоискусный усрамится от лица.

²⁶Безумный дверьми приничет во храмину, муж же наказан вне станет.

²⁷Ненаказание человеку слушати при дверех, мудрый же отяготится безчестием.

²⁸Устне многоречивых не своя си поведят, словеса же мудрых в мерилех станут.

²⁹Во устех буих сердце их, в сердцы же премудрых уста их.

³⁰Кленущу нечестивому сатану, сам кленет свою душу.

³¹Сквернит свою душу шепотливый, и где либо жити имать, возненавиден будет.