Read Елизаветинская Библия, 1751 Сирах 23 Bible Online

Сирах 23 - Елизаветинская Библия, 1751 bible

Сирах 23

¹Господи Отче и Владыко живота моего, не остави мене в совете их и не даждь ми впасти в ня.

²Кто возложит на помышление мое раны и на сердце мое наказание премудрости, да о неразумиих моих не пощадят, и да не прейдут греси их?

³Яко да не умножатся неведения моя и греси мои премнози да не будут, и падуся пред супостаты, и порадуетмися враг мой.

⁴Господи Отче и Боже живота моего, не даждь возношения очима моима и вожделение отврати от мене.

⁵Чрева похоть и блудодеяния да не оымут мя, и безстудней души не предаждь мене.

⁶Послушайте, чада, наказания уст: храняй бо не ят будет устнама своима.

⁷Устнама своима ят будет грешник, и клеветник и гордый поползнется в них.

⁸Заклинанию не обучай уст своих

⁹и клятися именем святым не навыкай.

¹⁰Якоже бо раб истязуемь часто от ран не умалится, такожде и кленыйся именем святым всегда от греха не очистится.

¹¹Муж кленыйся много исполнится беззакония, и не отступит от дому его язва:

¹²аще согрешит, грех его на нем, и аще презрит, сугубо согрешит:

¹³и аще вотще кляся, не оправдится, исполнится бо дом его нападения.

¹⁴Есть беседа облечена смертию: да не обрящется во наследии иаковли:

¹⁵от благочестивых бо вся сия отступят, и во грехи не впадутся.

¹⁶В ненаказании неключимем не обучай уст своих: есть бо в нем слово греха.

¹⁷Помяни отца твоего и матерь твою, посреде бо вельмож седиши:

¹⁸да не како забвен будеши пред ними, и обычаем своим обуяеши и похощеши, дабы ты не родился, и день рождения твоего прокленеши.

¹⁹Человек обучаяся словесем поношения во всех днех своих не научится.

²⁰Два вида умножают грехи и третий наводит гнев:

²¹душа тепла, яко огнь горящь, не угаснет, дондеже поглощена будет:

²²человек блудник в теле плоти своея не престанет, дондеже возжжет огнь.

²³Человеку блудну всяк хлеб сладок, не престанет, дондеже умрет.

²⁴Человек преступаяй ложе свое, глаголя в души своей: кто мя видит?

²⁵тма окрест мене, и стены закрывают мя, и никтоже мя видит, кого убоюся? грехов моих не воспомянет вышний.

²⁶И очи человечестии страх его:

²⁷и не разуме, яко очи Господни тмами тем крат светлейшии солнца суть,

²⁸прозирающии вся пути человеческия и разсматряющии в тайных местех:

²⁹прежде неже создана быша, вся уведена ему, такожде и по скончании.

³⁰Сей на путех града отмщен будет, и идеже не надеяшеся, ят будет.

³¹Такожде и жена оставльшая мужа своего и приемлющая наследника от иного:

³²первое бо от закона вышняго отступи, и второе мужу своему согреши, и третие блудом прелюбодействова, от чуждаго мужа чада сотвори:

³³сия пред собор изведена будет, и на чадех ея посещение будет:

³⁴не укоренятся чада ея в корень, и ветви ея не сотворят плода:

³⁵и оставит на клятву память свою, и поношение ея не потребится.

³⁶И уразумеют оставльшиися, яко ничтоже лучше страха Господня, и ничтоже сладчае, токмо внимати заповедем Господним.

³⁷Слава велия еже последовати Богу, долгота же дний еже прияту тебе быти от него.