Read Елизаветинская Библия, 1751 Сирах 24 Bible Online

Сирах 24 - Елизаветинская Библия, 1751 bible

Сирах 24

¹Премудрость похвалит душу свою и посреде людий своих восхвалится.

²В Церкви вышняго отверзет уста своя и прямо силе его восхвалится:

³аз из уст вышняго изыдох и яко мгла покрых землю,

⁴аз на высоких вселихся, и престол мой во столпе облачне,

⁵круг небесный обыдох едина и во глубине бездны походих,

⁶волну морскую и всю землю, и вся люди и язык стяжах,

⁷со всеми сими покоя взысках, и во наследии чием водворюся?

⁸Тогда заповеда ми создатель всех, и создавый мя препокои скинию мою и рече:

⁹во иакове вселися и во израили наследствуй.

¹⁰Прежде века из начала созда мя, и даже до века не оскудею.

¹¹Во скинии святей пред ним послужих и тако в сионе утвердихся:

¹²во граде возлюбленнем такожде мя препокои, и во Иерусалиме власть моя:

¹³и укоренихся в людех прославленных, в части Господни наследия его.

¹⁴Яко кедр вознесохся в ливане и яко кипарис на горах аермонских,

¹⁵яко финикс возвысихся на брезех и яко сад шипковый во иерихоне,

¹⁶яко маслина благолепна на поли, и вознесохся яко явор:

¹⁷якоже корица и яко аспалаф ароматов дах воню, и яко смирна избранна издах благоухание,

¹⁸яко халвани и оникс и стакти, и яко ливаново курение во скинии.

¹⁹Аз яко теревинф распрострох ветвия моя, и ветви моя ветви славы и благодати:

²⁰аз яко виноград прорастих благодать, и цвети мои плод славы и богатства.

²¹Приступите ко мне, желающии мене, и от плодов моих насытитеся:

²²память бо моя сладка паче меда, и наследие мое паче сота медвена.

²³Ядущии мя еще взалчут, и пиющии мя еще вжаждутся:

²⁴слушаяй мене не посрамится и делающии у мене не согрешат.

²⁵Сия вся книга завета Бога вышняго,

²⁶закон, егоже заповеда моисей, наследие сонмом иаковлим:

²⁷насыщая яко фисон премудростию и яко тигр во дни новоплодий,

²⁸исполняяй яко евфрат разума и якоже иордан во днех жатвы,

²⁹являяй яко свет наказание и якоже гион во дни оымания вина.

³⁰Не сконча первый уразумети ея, такожде и последний не изследи ея:

³¹ибо паче моря умножися размышление ея, и совет ея паче бездны велия.

³²И аз яко раскопание из реки и якоже водотечие изыдох в рай.

³³Рех: напою мой вертоград и упою себе луг:

³⁴и се, раскопание ми бысть рекою, и река моя бысть морем.

³⁵Понеже наказание яко утро просвещу и проявлю е даже до далече:

³⁶еще учение якоже пророчество излию и оставлю е в роды вечны.

³⁷Видите, яко не себе единому трудихся, но всем ищущым ея.