Read Елизаветинская Библия, 1751 Сирах 25 Bible Online

Сирах 25 - Елизаветинская Библия, 1751 bible

Сирах 25

¹Треми украсихся и стах красна пред Господем и человеки:

²единомыслием братий и любовию искренних, и муж и жена между собою согласни.

³Три же виды возненавиде душа моя, и зело ми омерзе живот их:

⁴убога горда, и богата лжива, и стара прелюбодея умаляющагося умом.

⁵Иже в юности не собрал еси, то како можеши обрести в старости твоей?

⁶Коль есть красен сединам суд, и старейшым разумети совет?

⁷Коль красна старым премудрость и славным разумение и совет?

⁸Венец старцем многоразличное искусство, и похваление их страх Господень.

⁹Девять помышлений ублажих в сердцы моем, а десятое изреку языком:

¹⁰человек веселяйся о чадех, живяй и зряй падение врагов.

¹¹Блажен живяй со женою разумною, и иже языком (своим) не поползнуся, и иже не поработа недостойному себе.

¹²Блажен, иже обрете мудрость и поведаяй во уши послушающих.

¹³Коль велик, иже мудрость обрете, но несть паче боящагося Господа.

¹⁴Страх Господень паче всего предуспе, держай его кому уподобится?

¹⁵Всяка язва и не язва сердечная и всякое лукавство и не лукавство женское:

¹⁶всякое нападение и не нападение ненавидящих, и всякое мщение и не отмщение врагов.

¹⁷Несть главы паче главы змиины, и несть ярости паче ярости вражия.

¹⁸Лучше жити со львом и змием, неже жити со женою лукавою.

¹⁹Лукавство жены изменяет зрак ея и омрачает лице свое яко вретище:

²⁰посреде искренних своих возляжет муж ея, и слышав воздохнет горько.

²¹Мала есть всяка злоба противу злобе женстей: жребий грешника спадет на ню.

²²Якоже восхождение по песку ногама стараго, тако жена язычна мужу молчаливу.

²³Не сматряй на красоту женскую и жены в похоть не пожелай.

²⁴Гнев и безстудие и срамота велика жена, аще обладает мужем своим.

²⁵Сердце смирено, и лице дряхло, и язва сердечна жена лукава:

²⁶руце немощныя и колена разслаблена, (жена) яже не блажит мужа своего.

²⁷От жены начало греха, и тою умираем вси.

²⁸Не даждь воде прохода, ни жене лукаве дерзновения:

²⁹аще не ходит под рукою твоею, отсецы ю от плоти твоея.