Read Елизаветинская Библия, 1751 Сирах 26 Bible Online

Сирах 26 - Елизаветинская Библия, 1751 bible

Сирах 26

¹Жены добрыя блажен есть муж, и число дний его сугубо.

²Жена добляя веселит мужа своего и лета его исполнит миром.

³Жена добра часть блага, в части боящихся Господа дана будет.

⁴Богатаго же и убогаго сердце благо, во всяко время лице тихо.

⁵От трех убояся сердце мое, и от лица четвертаго устрашихся:

⁶предания града и собрания народа, и оболгания над смерть, вся тяжестна.

⁷Болезнь сердца и сетование жена ревнива о жене,

⁸и язва языка всем приобщающаяся.

⁹Воловое иго движимо жена лукавна, держайся ея яко емляйся скорпии.

¹⁰Гнев велик жена пиянчива, и студа своего не покрыет.

¹¹Блуд женский в возвышении очес и бровьми ея познан будет.

¹²Над дщерию безстудною утверди стражу, да не попущение обретши употребит себе.

¹³Вслед безстудна ока сохранися и не дивися, аще в тя согрешит:

¹⁴яко жажден путник отверзет уста и от всякия воды ближния испиет,

¹⁵прямо всякаго кола сядет и прямо стрелы отверзет тул.

¹⁶Благодать женска возвеселит мужа ея, и кости его утучнит художество ея.

¹⁷Даяние Господне жена молчалива, и несть искупа наказанныя души.

¹⁸Благодать на благодати жена стыдлива,

¹⁹и несть мерило всякое достойное воздержныя души.

²⁰Солнце восходящее на высоких Господних,

²¹и доброта жены добрыя в красоте дому ея:

²²светилник сияя на свещнице святе, и доброта лица на возрасте постояннем.

²³Столпи злати на подстолпиих сребряных, и нозе красни на плеснах добре стоящих.

²⁴О двоих печально бысть сердце мое, и о третием ярость ми найде:

²⁵муж борец лишаяся за скудоту, и мужие разумиви аще отриновени будут:

²⁶возвращаяся от правды на грех, Господь уготовит его на мечь.

²⁷Едва измется купец от погрешения, и не оправдится корчемник от греха.