Read Елизаветинская Библия, 1751 Сирах 28 Bible Online

Сирах 28 - Елизаветинская Библия, 1751 bible

Сирах 28

¹Отмщаяй от Господа обрящет отмщение, и грехи своя соблюдаяй соблюдет.

²Остави обиду искреннему твоему, и тогда помольшутися, греси твои разрешатся.

³Человек на человека сохраняет гнев, а от Господа ищет изцеления:

⁴над человеком подобным себе не имать милости, а о гресех своих молится:

⁵сам сый плоть, хранит гнев: кто очистит грехи его?

⁶Помяни последняя и престани враждовати, (помяни) истление и смерть и пребывай в заповедех.

⁷Помяни заповеди и не гневайся на ближняго,

⁸и завет вышняго и презирай невежество.

⁹Удаляйся от свара и умалиши грехи:

¹⁰человек бо яр разжизает свар, и муж грешник возмятет други и посреде мирных вложит клевету.

¹¹Яково вещество огня, тако возгорится: якова крепость свара, такожде и огнь разгорится:

¹²якова крепость человеча, такожде ярость его будет, и якоже богатство его, возвысит гнев свой.

¹³Рвение скорое возжигает огнь, и свар наглый проливает кровь.

¹⁴Аще подуеши на искру, возгорится: и аще плюнеши на ню, угаснет: обоя же изо уст твоих исходят.

¹⁵Шепотника и двоязычника подобает клясти: многих бо мирных погубиша.

¹⁶Язык трегубый многи потрясе и разлучи я от языка во язык,

¹⁷и грады тверды разори и домы вельможей преврати:

¹⁸язык трегубый жены доблия изгна и лиши я от трудов их:

¹⁹внемляй ему не имать обрести покоя, ниже вселится со безмолвием.

²⁰Язва бичная струпы творит, язва же язычная сокрушает кости.

²¹Мнози падоша острием меча, но не якоже падшии языком:

²²блажен, иже укрыется от него, иже не пройде в ярости его, иже не повлече ига его и узами его не связан бысть:

²³иго бо его иго железно, и узы его узы медяны:

²⁴смерть люта смерть его, и паче его лучше есть ад.

²⁵Не обладает благоверными, и в пламени его не сгорят.

²⁶Оставляющии Господа впадутся в онь, и в них возгорится и не угаснет: послан будет на ня яко лев, и яко пард погубит я.

²⁷Виждь, огради стяжание твое тернием,

²⁸сребро твое и злато твое свяжи,

²⁹и словесем твоим сотвори вес и меру, и устам твоим сотвори дверь и завору.

³⁰Внимай, да не како поползнешися им, ниже падеши прямо ловящему.