Read Елизаветинская Библия, 1751 Сирах 29 Bible Online

Сирах 29 - Елизаветинская Библия, 1751 bible

Сирах 29

¹Творяй милость взаим даст искреннему, и укрепляяй руку свою соблюдает заповеди.

²Даждь взаим искреннему во время требования его и паки воздаждь искреннему во время:

³утверди слово и уверися с ним, и во всяко время обрящеши потребу твою.

⁴Мнози яко обретение возмнеша заимование и задаша труд помощником их:

⁵дондеже возмет, облобызает руце его и на имение искренняго смирит глас:

⁶и во время воздаяния провлечет время, и воздаст словеса уныния, и время обвинит.

⁷Аще же возможет воздати, едва половину принесет и вменит е яко обретение:

⁸аще же ни, лиши его имений своих и стяжа его врага туне:

⁹клятвы и укоризны воздаст ему и вместо славы воздаст ему безчестие.

¹⁰Мнози убо за лукавство отвергошася, и лишитися туне убояшася.

¹¹Обаче смиренному долготерпи и милостынею не продолжи его:

¹²заповеди ради заступи нищаго, и по нищете его не отврати его тща.

¹³Погуби сребро брата ради и друга, и да не оржавеет под каменем во пагубу.

¹⁴Положи сокровище свое по заповедем вышняго, и упользует тя паче нежели злато.

¹⁵Затвори милостыню во клетех твоих, и та измет тя от всякаго озлобления:

¹⁶паче щита тверда и паче копия тяжка, противу врагу поборет по тебе.

¹⁷Муж благ споручник будет искреннему, и погубивый стыд оставит его.

¹⁸Благодати споручника не забуди: даде бо душу свою за тя.

¹⁹Доброе поручение отвращает грешник, неблагодарный же мыслию оставит избавльшаго и.

²⁰Поручение многих погуби благоуправляющих и поколеба их яко волна морская:

²¹мужы сильны пресели, и заблудиша во языцех чуждих.

²²Грешник в поручение впадает, и гоняй дела чуждая впадет в суды.

²³Заступи искренняго по силе твоей, и внимай себе, да не впадеши.

²⁴Начало жития человеча вода и хлеб, и риза и дом покрываяй студ.

²⁵Лучше житие нищаго под кровом бервенным, нежели брашна добра в чуждих.

²⁶О мале и о велице доволен буди.

²⁷Живот зол из дому в дом, и аможе преселишися, не отверзеши уст своих:

²⁸угостиши и напоиши неблагодарных, и к сим зло услышиши:

²⁹приступи, пришелче, украси трапезу, и аще что в руце твоей, ухлеби мя:

³⁰изыди, пришелче, от лица славы, прииде бо мне в гости брат, и потреба дому.

³¹Тяжка сия человеку имущу разум, запрещение храмины и поношение заимодавца.