Read Елизаветинская Библия, 1751 Сирах 3 Bible Online

Сирах 3 - Елизаветинская Библия, 1751 bible

Сирах 3

¹Мене отца послушайте, чада, и сице творите, да спасетеся:

²Господь бо прослави отца на чадех и суд матере утверди на сынех.

³Чтый отца очистит грехи,

⁴и яко сокровищствуяй прославляяй матерь свою.

⁵Чтый отца возвеселится о чадех и в день мольбы своея услышан будет.

⁶Прославляяй отца долгоденствовати будет, и послушаяй Господа упокоит матерь свою.

⁷Бояйся Господа почтит отца и яко владыкам послужит родившым его.

⁸Делом и словом чти отца твоего и матерь, да найдет ти благословение от них.

⁹Благословение бо отчее утверждает домы чад, клятва же матерня искореняет до основания.

¹⁰Не славися в безчестии отца твоего, несть бо ти слава отчее безчестие:

¹¹слава бо человеку от чести отца его, и поношение чадом мати в безславии.

¹²Чадо, заступи в старости отца твоего и не оскорби его в животе его:

¹³аще и разумом оскудевает, прощение имей и не обезчести его всею крепостию твоею.

¹⁴Милость бо отча не забвена будет, и противу грехов присозиждется тебе:

¹⁵в день скорби твоея воспомянет тя: якоже лед от зноя, тако растают греси твои.

¹⁶Коль хулен оставляяй отца, и проклят Господем раздражаяй матерь свою.

¹⁷Чадо, в кротости дела твоя препровождай, и человеком приятным возлюблен будеши.

¹⁸Елико велик еси, толико смиряйся, и пред Господем обрящеши благодать.

¹⁹Мнози суть высоцы и славни: но кротким открываются тайны,

²⁰яко велия сила Господня, и смиренными славится.

²¹Вышших себе не ищи и крепльших себе не испытуй.

²²Иже ти повеленна, сия разумевай: несть бо ти потреба тайных.

²³Во избытцех дел твоих не любопытствуй: вящшая бо разума человеческаго показана ти суть:

²⁴многи бо прельсти мнение их, и мнение лукавно погуби мысль их.

²⁵И любяй бедство впадет в не:

²⁶сердце жестоко озлобится на последок:

²⁷сердце жестоко отяготится болезньми, и грешник приложит грехи на грехи.

²⁸В наведении величаваго несть изцеления: сад бо лукавствия вкоренися в нем.

²⁹Сердце разумиваго уразумеет притчу, и ухо слышателя вожделение премудраго.

³⁰Огнь горящь угасит вода, и милостыня очистит грехи.

³¹Воздаяй благодати помнимь бывает по сих и во время падения своего обрящет утверждение.