Read Елизаветинская Библия, 1751 Сирах 31 Bible Online

Сирах 31 - Елизаветинская Библия, 1751 bible

Сирах 31

¹Бдение богатства растлевает плоти, и попечение его отгонит сон:

²печаль бдения отторгает дремание, и недуг лют отимает сон.

³Трудится богатый в собирании богатства и в покои насыщается сладостей своих:

⁴трудится убогий во умалении жития, и в покои скудный бывает.

⁵Любяй злато не оправдится, и гоняй растление сим насытится.

⁶Мнози падоша злата ради, и бысть пагуба их прямо лицу их.

⁷Древо претыкания есть всем жрущым ему, и всяк безумлив ят будет им.

⁸Блажен богатый, иже обретеся без порока и иже вслед злата не иде.

⁹Кто есть сей? и ублажим его, сотвори бо дивная в людех своих.

¹⁰Кто искушен им и совершен бысть? и будет на похваление.

¹¹Кто могл преступити, и не преступи, и зло сотворити, и не сотвори?

¹²Утвердятся благая его, и милостыни его исповесть собрание.

¹³Сел ли еси при трапезе велицей, не разверзи на ней гортани твоего

¹⁴и не рцы: много на ней есть. Помяни, яко зло есть око лукаво.

¹⁵Лукавнее ока что есть создано? сего ради о коей либо вещи слезит.

¹⁶Идеже аще узриши, не простирай руки и не гнетися с ним в солило.

¹⁷Разсуждай, яже суть искренняго, от тебе самаго, и о всяцей вещи размышляй.

¹⁸Яждь яко человек предлежащее ти и не пресыщайся, да не возненавиден будеши.

¹⁹Престани первый ради наказания и не пресыщайся, да не преткнешися:

²⁰и аще сядеши посреде многих, первее их не простри руки твоея.

²¹Коль доволно человеку наказанному малое, и на одре своем не постраждет зла.

²²Сон здравый от чрева умеренна: воста заутра, и душа его с ним:

²³труд бдения и холера и чревоболение с мужем ненасытным.

²⁴И аще отяготился еси брашны, востани от трапезы и почиеши.

²⁵Послушай мене, чадо, и не уничижи мене, и на последок обрящеши словеса моя.

²⁶Во всех делех твоих буди тщателен, и всяк недуг не имать приступити к тебе.

²⁷Щедраго хлебами благословят устне, и послушество доброты его верно.

²⁸На скупаго в хлебех поропщет град, и послушество злобы его известно.

²⁹В вине не мужайся, многих бо погуби вино.

³⁰Пещь искушает железо в калении, тако вино сердца гордых во пиянстве.

³¹Полезно вино животу человечу, аще пиеши е в меру его.

³²Кий живот побеждаемому вином? сие бо на веселие человеком создано есть.

³³Радование сердца и веселие души вино пиемо во время прилично:

³⁴горесть души вино пиемо много в распри и клевете:

³⁵умножает пиянство ярость безумнаго на претыкание, умаляя крепость и сотворяя струпия.

³⁶В пире вина не обличай искренняго и не уничижи его в веселии его:

³⁷словесе поносна не рцы ему и не оскорби его во истязании.