Read Елизаветинская Библия, 1751 Сирах 32 Bible Online

Сирах 32 - Елизаветинская Библия, 1751 bible

Сирах 32

¹Старейшину ли тя поставиша, не возносися, но буди в них яко един от них:

²попецыся ими, и тако сяди. И всю потребу твою сотворив возлязи,

³да возвеселишися их ради и красоты ради приимеши венец.

⁴Глаголи, старейшино, подобает бо ти,

⁵испытною хитростию и не возбрани мусикии:

⁶идеже слушание (будет), не изливай беседы и без времене не мудрися.

⁷Печать анфракса на украшении злате, и сладкогласие мусикиев в пиршестве вина.

⁸Во украшении златем печать смарагдова, сладкопение мусикиев по сладцем вине.

⁹Глаголи, юноше, аще тебе есть потреба, едва дващи, аще вопрошен будеши:

¹⁰сократи слово, малыми многая (изглаголи): буди яко ведый и вкупе молчя.

¹¹Посреде вельмож не равен творися и иному глаголющу не многослови.

¹²Прежде грома предваряет молния, и прежде стыдливаго предваряет благодать.

¹³Во время воставай, а не последи (иных), в дом отиди и не ленися:

¹⁴тамо играй и твори помышления твоя, и не согрешай словом гордым.

¹⁵И о сих благослови сотворшаго тя и упоевающаго тя от благ своих.

¹⁶Бояйся Господа приимет наказание, и утренюющии обрящут благоволение.

¹⁷Ищай закона насытится его, и лицемерствуяй соблазнится о нем.

¹⁸Боящиися Господа обрящут суд и оправдания яко свет возжгут.

¹⁹Человек грешник укланяется от обличения и по воли своей обретает извинение.

²⁰Муж советный не презрит размышления, чуждый же и гордый не убоится страха и по сотворении своем без совета.

²¹Без совета ничесоже твори, и егда сотвориши, не раскаявайся.

²²На пути падения не ходи и не претыкайся о камение:

²³не веруй пути, в немже не претыкаешися, и от чад своих хранися.

²⁴Во всяцем деле блазе веруй душею твоею, ибо сие есть соблюдение заповедий.

²⁵Веруяй закону внимает заповедем, и уповаяй на Господа не умалится.