Read Елизаветинская Библия, 1751 Сирах 35 Bible Online

Сирах 35 - Елизаветинская Библия, 1751 bible

Сирах 35

¹Соблюдаяй закон умножает приношения, приносит жертву спасения внимаяй заповедем.

²Воздаяй благодать аки приносяй семидал, и творяй милостыню аки жряй жертву хваления.

³Благоволение Господне еже отступити от лукавства, и очищение есть еже отступити от неправды.

⁴Не явися пред Господем тощь: вся бо сия заповеди ради.

⁵Приношение праведнаго утучняет олтарь, и благоухание его пред вышним:

⁶жертва мужа праведнаго приятна, и память ея не забвена будет.

⁷Оком благим прослави Господа и не умали от начатка рук твоих:

⁸во всяцем даянии весело имей лице твое и со веселием освяти десятину.

⁹Даждь вышнему по даянию его, и оком благим приобретение руки:

¹⁰яко Господь воздаяй есть и седмерицею воздаст ти.

¹¹Дара не умаляй, ибо не приимет, и не внимай жертве неправедней:

¹²яко Господь судия есть, и несть у него славы лица.

¹³Не приимет лица на убога и молитву обидимаго услышит:

¹⁴не презрит молитвы сираго, ни вдовицы, егда излиет прошение.

¹⁵Не слезы ли вдовичи по ланитома текут, и вопль ея на наведшаго я?

¹⁶Служай (Богу) во благоволении прият будет, и молитва его до облак дойдет:

¹⁷молитва смиреннаго пройде облаки, и дондеже приближится, не утешится,

¹⁸и не отступит, дондеже посетит вышний, судит в правду и сотворит суд:

¹⁹и Господь не замедлит, ниже имать долготерпети о них, дондеже сокрушит чресла немилостивых.

²⁰И языком воздаст месть, дондеже потребит множество досадителей и скиптры неправедных сокрушит:

²¹дондеже воздаст человеку по деянием его, по делом человеческим и помышлением их:

²²дондеже разсудит судом люди своя и возвеселит я милостию своею.

²³Коль красна милость во время скорби его, якоже облацы дождевнии во время бездождия.