Read Елизаветинская Библия, 1751 Сирах 36 Bible Online

Сирах 36 - Елизаветинская Библия, 1751 bible

Сирах 36

¹Помилуй ны, Владыко, Боже всех, и воззри,

²и наложи страх твой на вся языки:

³воздвигни руку твою на языки чужды, и да узрят силу твою.

⁴Якоже пред ними освятился еси в нас, такожде пред нами возвеличися на них:

⁵и да познают тя, якоже и мы познахом тя, яко несть Бога разве тебе, Господи.

⁶Обнови знамения и измени чудеса,

⁷прослави руку и мышцу десную (твою), воздвигни ярость и излий гнев,

⁸изми сопостата и сотри врага,

⁹поспеши время и помяни клятву, и да поведят величия твоя.

¹⁰Гневом огня пояден да будет спасаяйся, и озлобляющии людий твоих да обрящут пагубу.

¹¹Сокруши главы князей вражиих, глаголющих: несть разве нас.

¹²Собери вся колена иаковля и наследствуй их якоже от начала.

¹³Помилуй люди, Господи, нареченныя именем твоим, и израиля, егоже первенцем нарекл еси.

¹⁴Ущедри град святыни твоея, Иерусалим, место покоища твоего.

¹⁵Исполни сиона взяти словеса твоя, и от славы твоея люди твоя.

¹⁶Даждь свидетелство сущым от начала тварем твоим и воздвигни пророчествия сущая о имени твоем:

¹⁷даждь мзду терпящым тебе, и пророцы твои да уверятся.

¹⁸Услыши, Господи, мольбы молитвенник твоих, по благословению аароню о людех твоих,

¹⁹и уразумеют вси сущии на земли, яко ты Господь еси, Бог веков.

²⁰Всяко брашно яст чрево: есть же брашно брашна добрее.

²¹Гортань вкушает брашна от лова, тако сердце разумиво словеса ложна.

²²Сердце строптиво даст печаль, и человек многоискусный воздаст ему.

²³Всякаго мужеска полу приимет жена: есть же дщерь дщере лучше.

²⁴Доброта женска веселит лице и над все желание человеческо предуспевает:

²⁵аще есть на языце ея милость и кротость, несть муж ея точен сыном человеческим.

²⁶Стяжавый жену начинает имети стяжание, помощника по себе и столпа покою.

²⁷Идеже несть ограды, расхищено будет имение, и идеже несть жены, воздохнет скитаяся:

²⁸кто бо поверит вооружену разбойнику преходящу от града во град?

²⁹Такожде и человеку не имущу гнезда и обитающу, идеже обвечеряет.