Read Елизаветинская Библия, 1751 Сирах 37 Bible Online

Сирах 37 - Елизаветинская Библия, 1751 bible

Сирах 37

¹Всяк друг речет: содружихся ему и аз. Но есть друг именем точию друг.

²Печаль не пребывает ли до смерти, приятель и друг претворяяйся во врага?

³о, лукаво помышление, откуду извалилося еси покрыти сушу лестию?

⁴Приятель о веселии дружни срадуется, а во время скорби противен будет:

⁵приятель со другом труждается чрева ради и противу брани возмет щит.

⁶Не забуди друга в души твоей и не поминай его во имении твоем.

⁷Всяк советник возносит совет, но есть совещаяй о себе самем.

⁸От советника храни душу твою и разумей первее, что ему потреба: сам бо себе совещавает:

⁹да не когда возложит на тя жребий и речет ти: добр путь твой: и станет прямо, видети, что сбудется тебе.

¹⁰Не совещавай с подзирающим тя и от завидящих ти скрый совет:

¹¹со женою о ревнующей ей и со страшливым о брани, с купцем о мене и со купующим о продажи, со завидливым о благодарении

¹²и с немилостивым о помиловании, с ленивым о всяцем деле

¹³и с наемником годовым о совершении, с рабом ленивым о мнозе делании.

¹⁴Не внемли сим о всяцем совещании,

¹⁵но токмо с мужем благоговейным присно буди, егоже аще познаеши соблюдающа заповеди Господни,

¹⁶иже душею своею по души твоей, и аще согрешиши, споболит с тобою.

¹⁷И совет сердца устави, несть бо ти вернее его:

¹⁸душа бо мужа возвещати некогда более обыче, нежели седмь блюстителие высоце седящии на стражи.

¹⁹И о всех сих помолися вышнему, да управит во истине путь твой.

²⁰Начаток всякаго дела слово, и прежде всякаго делания совет.

²¹След изменения сердечна лице. Четыри части происходят: добро и зло, живот и смерть: и обладаяй ими всегда язык есть.

²²Есть муж хитр и наказатель многим, а своей души неключимь есть.

²³Есть умудряяйся в словесех ненавидимь: сей всякия пищи лишен будет:

²⁴не дана бо бысть ему от Господа благодать, яко всякия премудрости лишен бысть.

²⁵Есть премудр своей души, и плоды разума его во устех верны.

²⁶Муж премудр люди своя накажет, и плоды разума его верны.

²⁷Муж премудр исполнится благословения, и ублажат его вси зрящии.

²⁸Живот мужа в числе дний: а дние израилевы безчисленни.

²⁹Премудрый во своих людех наследит веру, и имя его живо будет во век.

³⁰Чадо, в животе твоем искуси душу твою и виждь, что ей зло есть, и не даждь ей.

³¹Ибо не вся всем на пользу, и не всяка душа во всем благоволит.

³²Не пресыщайся во всяцей сладости и не разливайся на (различие) брашна,

³³ибо во мнозех брашнах недуг будет, и пресыщение приближит даже до холеры:

³⁴пресыщением бо мнози умроша, внимаяй же приложит житие.