Read Елизаветинская Библия, 1751 Сирах 40 Bible Online

Сирах 40 - Елизаветинская Библия, 1751 bible

Сирах 40

¹Непразднство велие создано бысть всякому человеку, и иго тяжко на сынех адамлих, от дне исхода из чрева матере их до дне погребения в матерь всех.

²Размышления их и страх сердечный, помышление чаяния, день скончания:

³от седящаго на престоле славы и даже до смиреннаго на земли и пепеле,

⁴от носящаго багряницу и венец и даже до одевающагося льняною,

⁵ярость и зависть, и мятеж и молва, и страх смерти и вражда и рвение, и во время покоя на ложи сон нощный изменяет разум его:

⁶мало яко ничтоже на покой, и от того во снех яко во днех блюдения:

⁷возмущен видением сердца своего, яко избежав от лица брани, во время спасения своего воста, и дивяся ни при единем же страсе.

⁸Со всякою плотию от человека даже до скота, и на грешных седмерицею к сим:

⁹смерть и кровь, и рвение и оружие, наведения, глад и сокрушение и раны,

¹⁰на беззаконных создана быша сия вся, и сих ради бысть потоп.

¹¹Вся, елика от земли, в землю возвращаются, и от воды, в море возвращаются.

¹²Всяк дар и неправда истребится, а вера во век стояти будет.

¹³Имение неправедных яко река изсхнет, и якоже гром велик в дождь возгремит.

¹⁴Егда разгнет руце, возвеселится, тако преступающии до конца изчезнут.

¹⁵Изчадия нечестивых не умножат ветвий, и корения нечистая на тверде камени:

¹⁶злак над всякою водою и на брезе реки прежде всякия травы исторжен будет.

¹⁷Благодать яко рай во благословениих, и милостыня во век пребывает.

¹⁸Живот самодоволнаго делателя усладится, и паче обоих обретаяй сокровище.

¹⁹Чада и созидание града утверждают имя, и паче обоих жена непорочна вменяется.

²⁰Вино и мусикиа веселят сердце, а паче обоих возлюбление премудрости.

²¹Свирель и псалтирь услаждают песнь, а паче обоих язык сладкий.

²²Благодати и доброты возжелает око твое, а паче обоих злака семене.

²³Приятель и друг сретающася во время, а паче обоих жена с мужем.

²⁴Братия и помощь во время скорби, а паче обоих милостыня избавит.

²⁵Злато и сребро утвердят ногу, а паче обоих совет благоугоден будет.

²⁶Имение и крепость вознесут сердце, а паче обоих страх Господень:

²⁷несть во страсе Господни умаления и несть в нем лишения помощи:

²⁸страх Господень яко рай благословения, и паче всякия славы покры его.

²⁹Чадо, животом просливым не живи: лучше умрети, нежели просити.

³⁰Муж зря на чуждую трапезу, несть живот его в числе живота: опечалит душу свою чуждыми брашны:

³¹муж же худог и наказан сохранится.

³²Во устех нестыдливаго прошение усладится, и во чреве его огнь возгорится.