Read Елизаветинская Библия, 1751 Сирах 42 Bible Online

Сирах 42 - Елизаветинская Библия, 1751 bible

Сирах 42

¹Не стыдися о сих и не приими лица, еже согрешати:

²о законе вышняго и завете, и о суде, еже оправдати нечестиваго,

³о словеси союбщника и о путницех, и о даянии наследия другов,

⁴о истине мерила и весов, о стяжании многих и малых,

⁵о различии продаяния купцев и о наказании мнозе чад, и еже рабу лукаву ребра окровавити.

⁶На жене лукаве добро (есть) печать, и идеже многи руки, затвори.

⁷Еже аще предаси, в число и меру, даждь и возми все писанием.

⁸О наказании неразумива и буяго, и престарелаго судящагося с юными, и будеши наказан истинно и искушен пред всяким живущим.

⁹Дщерь отцу сокровенно бдение, и попечение о ней отгоняет сон: во юности своей да не когда презреет и сожителствующи (с мужем), да не когда возненавидена будет:

¹⁰в девстве да не когда осквернится и во отчих ея непраздна будет, и с мужем сущи да не когда преступит и сожителствующи да не когда неплоды будет.

¹¹Над дщерию безстудною утверди стражу, да не когда сотворит тя обрадование врагом, беседу во граде и отлученаго от людий, и посрамит тя в народе мнозе.

¹²Не взирай на доброту всякаго человека и посреде жен не седи:

¹³от риз бо исходит молие, и от жены лукавство женское.

¹⁴Лучше злоба мужеска, нежели добродетелная жена, и жена посрамляющая в поношение.

¹⁵Помяну убо дела Господня, и яже видех, повем: во словесех Господних дела его:

¹⁶солнце просвещая на вся призре, и славы его исполнено дело его.

¹⁷Не сотвори ли святым Господь поведати вся чудеса его, яже утверди Господь вседержитель, утвердитися всему во славе его?

¹⁸Бездну и сердце изследова и в коварствех их размысли: разуме бо Господь всяко ведение и призре на знамение века,

¹⁹возвещая мимошедшая и будущая и открывая следы тайных:

²⁰не прейде его всяко помышление, не утаися от него ни едино слово.

²¹Величия премудрости своея украси: иже есть прежде века и во век,

²²ни приложися, ни умалися и не востребова ни единаго советника.

²³Коль вся дела его вожделенна, и даже до искры есть видети.

²⁴Вся сия живут и пребывают во век во всех требованиих, и вся послушают.

²⁵Вся сугуба, едино противу единаго: и не сотвори ничтоже скудно.

²⁶Едино от единаго утверди благая: и кто насытится, зря славу его?