Read Елизаветинская Библия, 1751 Сирах 43 Bible Online

Сирах 43 - Елизаветинская Библия, 1751 bible

Сирах 43

¹Слава высоты, твердь чистоты, зрак небесе в видении славы.

²Солнце во явлении возвещающее во исходе сосуд дивен, дело вышняго.

³В полудни своем изсушает страну, и прямо вару его кто постоит?

⁴(Аки) пещь дышущее в делех вара, трегубо солнце пожигающее горы: воскурения огненная издышущее и простирающее лучи омрачает очи.

⁵Велий Господь сотворивый е, и словесы своими ускори шествие.

⁶И луна всем во свое время являет лета и знамение века.

⁷От луны знамение праздника: светило умаляющееся до конца.

⁸Месяц по имени своему есть, возрастающь дивно во изменении.

⁹Сосуд ополчений на высоте, на тверди небесней сияющь.

¹⁰Доброта небесе, слава звезд, красота светящися на высоких Господних:

¹¹словесы святаго станут по чину и не имут ослабети в стражбах своих.

¹²Виждь дугу и благослови сотворшаго ю, зело прекрасна сиянием своим:

¹³окружи небо окружением славы, руце вышняго простросте ю.

¹⁴Повелением его потщася снег, и ускоряет молнию судбою своею.

¹⁵Сего ради отверзошася сокровища, и парят облацы яко птицы.

¹⁶Величием своим укрепи облаки, и сокрушишася камение градное:

¹⁷и воззрением его подвижутся горы, и волею его возвеет юг.

¹⁸Глас грома его порази землю, и буря северова и вихорь ветра.

¹⁹Яко птицы парящыя сыплет снег, и якоже прузи садящиися спадения его.

²⁰Доброте белости его подивится око, и о дожди его ужаснется сердце.

²¹И слану яко соль на землю сыплет, и смерзшися бывает на концы остра.

²²Студен ветр северный возвеет, и смерзнется лед от воды: на всяцем собрании воднем обитати имать, и аки во броню облечется вода.

²³Пояст горы и пустыни пожжет, и угасит траву яко огнь.

²⁴Изцеление всех со тщанием мгла: роса сретающая от вара утишит.

²⁵Мыслию его преста бездна, и насади в ней (Господь) островы.

²⁶Плавающии по морю поведают бедство его, и слухом ушес наших чудимся,

²⁷и тамо (суть) преславна и чудна дела его, различие всякаго животнаго, создание китов.

²⁸Им благополучный конец свой получают и словом его составляются всяческая.

²⁹Много имамы рещи, и не имамы постигнути, и скончание словес: все есть той.

³⁰Славяще его где укрепимся? той бо велик паче всех дел своих:

³¹страшен Господь и велик зело, и чудно могутство его.

³²Славяще Господа вознесите, елико аще можете, превзыдет бо и еще:

³³возносяще его умножитеся крепостию: не трудитеся, не имате бо постигнути.

³⁴Кто виде его и исповесть? и кто возвеличит его, якоже есть?

³⁵Многа сокровена суть вящшая сих: малая бо видехом дел его.

³⁶Вся бо сотвори Господь и благочестивым даде премудрость.