Read Елизаветинская Библия, 1751 Сирах 44 Bible Online

Сирах 44 - Елизаветинская Библия, 1751 bible

Сирах 44

¹Восхвалим убо мужы славны и отцы нашя в бытии.

²Многу славу созда Господь в них величием своим от века.

³Господствующе во царствиих своих и мужие именити силою, советующе разумом своим, провещавшии во пророчествах,

⁴старейшины людий в советех и в разуме писания людий:

⁵премудрая словеса в наказании их, ищуще гласа мусикийска и поведающе повести во писаниих:

⁶мужие богатии, обдаровани крепостию, мирно живуще в жилищих своих.

⁷Вси сии в родех прославлени быша, и во днех их похвала.

⁸Суть от них, иже оставиша имя, еже поведати хвалы: и суть, ихже несть памяти, и погибоша яко не сущии, и быша яко не бывше, и чада их по них.

⁹Но сии мужие милостивии, ихже правды не забвены быша:

¹⁰с семенем их пребудет доброе наследие, изчадия их в заветех:

¹¹остася семя их, и чада их по них:

¹²до века пребудет семя их, и слава их не потребится:

¹³телеса их в мире погребена быша, а имена их живут в роды.

¹⁴Премудрость их поведят людие, и похвалу их исповесть церковь.

¹⁵Енох угоди Господеви и преложися, образ покаяния родом.

¹⁶Ное обретеся совершен, праведен, во время гнева бысть примирение:

¹⁷сего ради бысть останок земли, егда бяше потоп.

¹⁸Заветы вечнии положени быша с ним, да не потребится потопом всяка плоть.

¹⁹Авраам великий отец множеству языков, и не обретеся подобный во славе его:

²⁰иже соблюде закон вышняго и бысть в завете с ним:

²¹и на плоти его устави завет и во искушении обретеся верен:

²²сего ради клятвою постави с ним благословитися языком о семени его,

²³умножити его яко персть земли, и яко звезды возвысити семя его, и наследити им от моря до моря и от реки до края земли.

²⁴И о исааце утверди сице авраама ради отца его благословение всех человеков и завет:

²⁵и почи на главе иаковли.

²⁶Позна его благословении своими и даде его в наследие, и раздели части его на колен дванадесять,

²⁷и изведе от него мужа милости, обретшаго благодать пред очесы всякия плоти.