Read Елизаветинская Библия, 1751 Сирах 45 Bible Online

Сирах 45 - Елизаветинская Библия, 1751 bible

Сирах 45

¹Возлюбленный Богом и человеки моисей, егоже память во благословениих.

²Уподобил есть его славе святых и возвеличи его во страсе врагов.

³Во словесех его знамения устави и прослави его пред лицем царей: заповеда ему к людем своим и показа ему славу свою:

⁴в вере и кротости его освяти его, избра его от всякия плоти.

⁵Слышан сотворил есть ему глас свой и введе его во мглу,

⁶и даде ему пред лицем заповеди, закон жизни и ведения, еже научити иакова завету и судбам его израиля.

⁷Аарона возвыси свята, подобна ему брата его от колена левиина,

⁸постави ему завет вечен и даде ему иерейство людий, ублажи его благоукрашением и препояса его одеждою славы,

⁹облече его в совершение хваления и утверди его сосудами крепости,

¹⁰остегнми и подиром и епомидою,

¹¹и окружи его шипки златыми и звонцы многими окрест, глашати глас во ступаниих его, слышан творити глас в церкви в память сыном людий своих:

¹²одеждою святою, со златом и иакинфом и порфирою, делом пестроделца, словом суда, явленьми истины,

¹³истканною багряностию, делом художничим, камении многоценными, изваяньми печати, в связании злата, делом каменноделателя, на память в писании изваяннем по числу колен израилевых:

¹⁴венец злат верху кидара, изображение печати святыни, похвала чести, дело крепости, вожделения очес красима прекрасна.

¹⁵Прежде его не быша таковая до века.

¹⁶Не облечеся иноплеменник, точию сынове его и внучата его присно.

¹⁷Жертвы их приносимы бяху по вся дни непрестанно дважды.

¹⁸Исполни моисей руце и помаза его елеем святым.

¹⁹Бысть ему в завет вечен, и семени его во днех неба, служити ему вкупе и священствовати, и благословляти люди его именем его.

²⁰Избра его от всех живых принести жертву Господеви, фимиам и благоухание на память, на очищение людем своим.

²¹Даде ему заповеди своя, власть в заветех судеб, научити иакова свидением и в законе его просветити израиля.

²²Восташа нань чуждии, и возревноваша ему в пустыни мужие, иже при дафане и авироне, и сонм кореов в ярости и гневе.

²³Виде Господь и не благоволи, и скончашася яростию гнева:

²⁴сотвори в них знамения, погубити я огнем пламене.

²⁵И приложи ааронови славу и даде ему наследие: начатки первых жит раздели ему.

²⁶Хлеб в первых уготова на сытость: ибо жертвы Господни ясти будут, яже даде ему и семени его.

²⁷Обаче в земли людий не наследствит, и в людех не будет ему части: сам бо часть его и наследие.

²⁸И финеес сын елеазаров третий во славе, егда ревноваше страху Господню, и ста в превращении людий благостию усердия души своея, и умоли о израили.

²⁹Сего ради поставлен ему бысть завет мирен, предстателем быти святых и людем его, да будет ему и семени его священства величество во век.

³⁰И завет давиду, сыну иессеову от колена иудова, наследство царя сына от сына единаго: достояние священства аарону и семени его.

³¹Да даст нам премудрость в сердцах наших судити людем его в правду, да не потребятся благая их и слава их в роды их.