Read Елизаветинская Библия, 1751 Сирах 51 Bible Online

Сирах 51 - Елизаветинская Библия, 1751 bible

Сирах 51

¹Молитва иисуса сына сирахова. Исповемся тебе, Господи Царю, и восхвалю тебе, Бога спаса моего, исповедаюся имени твоему,

²яко покровитель и помощник был еси ми

³и избавил еси тело мое от пагубы и от сети клеветы язычныя, от устен делающих лжу, и на противящихся ми был еси помощник,

⁴и избавил мя еси по множеству милости имене твоего от скрежетания готовых снести мя,

⁵из руки ищущих души моея, от многих скорбей, яже имех,

⁶от стужания огненнаго окрест и от среды огня, идеже не сожегохся,

⁷из глубины чрева адова и от языка нечиста и словесе ложна, ко царю от оболгания языка неправедна.

⁸Приближися даже до смерти душа моя,

⁹и живот мой бе близ ада преисподняго.

¹⁰Обдержаша мя отвсюду, и не бе помогающаго: воззрех на помощь человечу, и не бе.

¹¹И помянух милость твою, Господи, и деяние твое, еже от века:

¹²яко изимаеши терпящих тя, (Господи,) и спасаеши их от рук вражиих.

¹³И вознесох от земли моление мое и о избавлении от смерти помолихся:

¹⁴и призвах Господа, Отца Господа моего, не оставити мене во дни скорби, во время гордых без помощи.

¹⁵Восхвалю имя твое непрестанно и воспою тя во исповедании. И услышана бысть молитва моя.

¹⁶Спасл бо мя еси от пагубы и изял еси мя от времене лукавна.

¹⁷Сего ради исповемся тебе, и восхвалю тя, и благословлю имя твое, Господи.

¹⁸Еще юн сый, прежде неже странствовати ми, исках премудрости яве в молитве моей:

¹⁹пред церковию молихся о ней, и даже до последних взыщу ея: от цвета, яко зреющаго грозда,

²⁰возвеселися сердце мое о ней: пойде нога моя в правости, от юности моея изследих ю.

²¹Приклоних мало ухо мое и приях, и многое обретох себе наказание:

²²предуспеяние бысть ми в ней.

²³Дающему мне премудрость воздам славу.

²⁴Умыслих бо творити ю, и поревновах благому, и не постыжуся.

²⁵Боряшеся душа моя о ней, и в творении моем испытах:

²⁶руце мои воздех на высоту и неведения ея уразумех.

²⁷Душу мою направих к ней,

²⁸сердце стяжах с нею исперва, и во очищении обретох ю: сего ради не оставлен буду.

²⁹И утроба моя смятеся ищущи ея: темже стяжах благое стяжание.

³⁰Даде Господь язык ми мзду мою, и тем восхвалю его.

³¹Приближитеся ко мне, ненаказаннии, и водворитеся в дому наказания.

³²Почто лишаетеся, глаголете, в сих, и души вашя жаждут зело?

³³Отверзох уста моя и глаголах: стяжите себе без сребра (мудрость):

³⁴выю вашу подложите под иго, и да приимет душа ваша наказание: близ есть обрести ю.

³⁵Видите очима вашима, яко мало трудихся и обретох себе мног покой.

³⁶Приобщитеся наказанию многим числом сребра, и много злато пристяжете ею.

³⁷Да возвеселится душа ваша в милости его, и да не постыдитеся в хвалении его.

³⁸Делайте дело ваше прежде времене, и даст мзду вашу во время свое.