Read Елизаветинская Библия, 1751 Сирах 6 Bible Online

Сирах 6 - Елизаветинская Библия, 1751 bible

Сирах 6

¹И вместо друга не буди враг, имя бо лукаво студ и поношение наследит: сице грешник двоязычен.

²Не возноси себе советом души твоея, да не расхищена будет аки юнец душа твоя:

³листвие твое пояси и плоды твоя погубиши и оставиши себе яко древо сухо.

⁴Душа лукава погубит стяжавшаго ю и порадование врагом сотворит его.

⁵Гортань сладок умножит други своя, и язык доброглаголив умножит добры беседы.

⁶Мирствующии с тобою да будут мнози, советницы же твои един от тысящ.

⁷Аще стяжеши друга, во искушении стяжи его и не скоро уверися ему:

⁸есть бо друг во время свое и не пребудет во время скорби твоея,

⁹и есть друг пременяяйся во врага и свар поношения твоего открыет,

¹⁰и есть друг общник трапезам и не пребудет во время скорби твоея:

¹¹и во благих твоих будет якоже ты и на рабы твоя дерзнет:

¹²аще смирен будеши, будет на тя и от лица твоего скрыется.

¹³От врагов твоих отлучися и от другов твоих внимай.

¹⁴Друг верен кров крепок: обретый же его обрете сокровище.

¹⁵Другу верну несть измены, и несть мерила доброте его.

¹⁶Друг верен врачевание житию, и боящиися Господа обрящут его.

¹⁷Бояйся Господа управляет дружбу свою, якоже бо сам, тако и искренний его.

¹⁸Чадо, от юности твоея избери наказание, и даже до седин обрящеши премудрость.

¹⁹Якоже оряй и сеяй приступи к ней и жди благих плодов ея:

²⁰в делании бо ея мало потрудишися и скоро ясти будеши плоды ея.

²¹Коль стропотна есть зело ненаказанным, и не пребудет в ней безумный:

²²якоже камень искушения крепок будет на нем, и не замедлит отврещи ея.

²³Премудрость бо по имени ея есть и не многим есть явна.

²⁴Слыши, чадо, и приими волю мою, и не отвержи совета моего:

²⁵и введи нозе твои во оковы ея и в гривну ея выю твою:

²⁶подложи рамо твое и носи ю, и не гнушайся узами ея:

²⁷всею душею твоею приступи к ней и всею силою твоею соблюди пути ея.

²⁸Изследи и взыщи, и познана ти будет, и емься за ню не остави ея:

²⁹на последок бо обрящеши покой ея, и обратится тебе на веселие.

³⁰И будут ти пута ея на покой крепости и гривны ея на одеяние славы.

³¹Красота бо злата есть на ней, и узы ея извитие иакинфово:

³²во одежду славы облечешися ею, и венец радости возложиши на ся.

³³Аще восхощеши, чадо, наказан будеши, и аще вдаси душу твою, хитр будеши:

³⁴аще возлюбиши слушати, приимеши, и аще приклониши ухо твое, премудр будеши.

³⁵Во множестве старейшин ставай, и аще кто премудр, тому прилепися. всяку повесть Божественную восхощи слышати, и притчи разума да не убежат тебе.

³⁶Аще узриши разумна, утренюй к нему, и степени дверий его да трет нога твоя.

³⁷Размышляй в повелениих Господних и в заповедех его поучайся присно: той утвердит сердце твое, и желание премудрости дано ти будет.