Read Елизаветинская Библия, 1751 Сирах 9 Bible Online

Сирах 9 - Елизаветинская Библия, 1751 bible

Сирах 9

¹Не ревнуй жене недра твоего, ниже научи на тебе самаго учению лукаву.

²Не даждь жене души твоея, еже превзыти ей над крепость твою.

³Не сретай жены блудницы, да не како впадеши в сети ея.

⁴К спевающей не примешайся, да не како увязнеши в начинаниих ея.

⁵Девы не назирай, да не когда соблазнишися в красоте ея.

⁶Не даждь блудницам души твоея, да не погубиши наследия твоего.

⁷Не обзирай стогн града и в пустых его не заблуждай.

⁸Отврати око твое от жены красныя и не назирай чуждыя доброты:

⁹добротою женскою мнози прельстишася, и от сея похоть яко огнь разгарается.

¹⁰С мужатицею отнюд не седи и не медли с нею в вине:

¹¹да не когда приклонится душа твоя на ню, и духом твоим поползнешися в пагубу.

¹²Не оставляй друга стараго, новый бо несть точен ему:

¹³вино новое друг нов: аще обетшает, с веселием испиеши его.

¹⁴Не ревнуй славе грешника: не веси бо, кое будет превращение его.

¹⁵Не соизволи изволением нечестивых: помяни, яко даже до ада не оправдятся.

¹⁶Далече отступи от человека, иже имать власть убивати, и не убоишися страха смертна:

¹⁷и аще приступиши, не согрешай, да не отимет живота твоего:

¹⁸познавай, яко посреде сетей минуеши и по забралом града ходиши.

¹⁹По крепости твоей разсмотряй искренняго и со премудрыми советуй.

²⁰С разумивыми буди размышление твое, и вся повесть твоя в законе вышняго.

²¹Мужие праведнии да вечеряют с тобою, и во страсе Господни буди хвала твоя.

²²От руки художников дело похвалено бывает, и вождь людий премудр в словеси своем.

²³Страшен во граде своем муж язычен, и дерзый в словеси своем возненавиден будет.