Read Елизаветинская Библия, 1751 Исаия 1 Bible Online

Исаия 1 - Елизаветинская Библия, 1751 bible

Исаия 1

¹Видение, еже виде исаиа сын амосов, еже виде на иудею и на Иерусалим, в царство озии и иоафама, и ахаза и езекии, иже царствоваша во иудеи.

²Слыши, небо, и внуши, земле, яко Господь возглагола: сыны родих и возвысих, тии же отвергошася мене.

³Позна вол стяжавшаго и, и осел ясли господина своего: израиль же мене не позна, и людие мои не разумеша.

⁴Увы, язык грешный, людие исполнени грехов, семя лукавое, сынове беззаконнии, остависте Господа и разгневасте святаго израилева, отвратистеся вспять.

⁵Что еще уязвляетеся, прилагающе беззаконие? Всякая глава в болезнь, и всякое сердце в печаль.

⁶От ног даже до главы несть в нем целости: ни струп, ни язва, ни рана палящаяся: несть пластыря приложити, ниже елеа, ниже обязания.

⁷Земля ваша пуста, гради ваши огнем пожжени, страну вашу пред вами чуждии поядают, и опусте низвращена от людий чуждих.

⁸Оставится дщерь сионя яко куща в винограде и яко овощное хранилище в вертограде, яко град воюемый.

⁹И аще не бы Господь саваоф оставил нам семене, яко содома убо были быхом, и яко гоморру уподобилися быхом.

¹⁰Услышите слово Господне, князи содомстии: внемлите закону Божию, людие гоморрстии.

¹¹Что ми множество жертв ваших, глаголет Господь? Исполнен есмь всесожжений овних и тука агнцев, и и крове юнцев и козлов не хощу.

¹²Ниже приходите явитися ми: кто бо изыска сия из рук ваших? ходити по двору моему не приложите.

¹³И аще принесете ми семидал, всуе: кадило мерзость ми есть.

¹⁴Новомесячий ваших и суббот и дне великаго не потерплю: поста и праздности, и новомесячий ваших и праздников ваших ненавидит душа моя: бысте ми в сытость, ктому не стерплю грехов ваших.

¹⁵Егда прострете руки (вашя) ко мне, отвращу очи мои от вас: и аще умножите моление, не услышу вас: руки бо вашя исполнены крове.

¹⁶Измыйтеся, (и) чисти будите, отимите лукавства от душ ваших пред очима моима, престаните от лукавств ваших.

¹⁷Научитеся добро творити, взыщите суда, избавите обидимаго, судите сиру и оправдите вдовицу,

¹⁸и приидите, и истяжимся, глаголет Господь. И аще будут греси ваши яко багряное, яко снег убелю: аще же будут яко червленое, яко волну убелю.

¹⁹И аще хощете и послушаете мене, благая земли снесте:

²⁰аще же не хощете, ниже послушаете мене, мечь вы пояст: уста бо Господня глаголаша сия.

²¹Како бысть блудница град верный сион полн суда? в немже правда почиваше, ныне же (в нем) убийцы.

²²Сребро ваше неискушено, корчемницы твои мешают вино с водою.

²³Князи твои не покаряются, общницы татем, любяще дары, гоняще воздаяние, сирым не судящии и суду вдовиц не внимающии.

²⁴Сего ради тако глаголет Владыка Господь саваоф: горе крепким во израили: не престанет бо ярость моя на противныя, и суд врагом моим сотворю:

²⁵и наведу руку мою на тя, и разжегу в чистоту, непокаряющихся же погублю, и отиму всех беззаконных от тебе, и всех гордых смирю.

²⁶И приставлю судии твоя якоже прежде, и советники твоя яко от начала: и по сих наречешися град правды, мати градовом, верный сион.

²⁷С судом бо спасется пленение его и с милостынею.

²⁸И сокрушатся беззаконнии и грешницы вкупе, и оставившии Господа скончаются:

²⁹занеже постыдятся о идолех своих, ихже сами восхотеша, и посрамятся о садех своих, ихже возжелеша.

³⁰Будут бо яко теревинф отметнувый листвия (своя), и яко вертоград не имый воды.

³¹И будет крепость их яко стебль изгребия, и делания их яко искры огненныя, и сожгутся беззаконницы и грешницы вкупе, и не будет угашаяй.