Read Елизаветинская Библия, 1751 Исаия 11 Bible Online

Исаия 11 - Елизаветинская Библия, 1751 bible

Исаия 11

¹И изыдет жезл из корене иессеова, и цвет от корене его взыдет:

²и почиет на нем дух Божий, дух премудрости и разума, дух совета и крепости, дух ведения и благочестия:

³исполнит его дух страха Божия: не по славе судити имать, ниже по глаголанию обличит,

⁴но судит правдою смиренному суд и обличит правостию смиренныя земли, и поразит землю словом уст своих и духом устен убиет нечестиваго:

⁵и будет препоясан правдою о чреслех своих и истиною обвит по ребрам своим:

⁶и пастися будут вкупе волк с агнцем, и рысь почиет со козлищем, и телец и юнец и лев вкупе пастися будут, и отроча мало поведет я:

⁷и вол и медведь вкупе пастися будут, и вкупе дети их будут, и лев аки вол ясти будет плевы:

⁸и отроча младо на пещеры аспидов и на ложе изчадий аспидских руку возложит:

⁹и не сотворят зла, ни возмогут погубити ни когоже на горе святей моей: яко наполнися вся земля ведения Господня, аки вода многа покры море.

¹⁰И будет в день оный корень иессеов, и востаяй владети языки, на того языцы уповати будут: и будет покой его честь.

¹¹И будет в день оный, приложит Господь показати руку свою, еже возревновати по останку прочему людий, иже аще останет от ассириов и от египта, и вавилона и от ефиопии, и от еламитов и от востоков солнца, и от аравии и от островов морских.

¹²И воздвигнет знамение в языки, и соберет погибшыя израилевы, и расточенныя иудины соберет от четырех крил земли.

¹³И отимется ревность ефремова, и врази иудины погибнут: ефрем не возревнует иуде, и иуда не оскорбит ефрема.

¹⁴И полетят в кораблех иноплеменничих, море купно пленят, и сущих от восток солнца, и идумею: и на моава первее руки возложат, сынове же аммони первии покорятся.

¹⁵И опустошит Господь море египетское и возложит руку свою на реку духом пресильным: и поразит на седмь дебрий, якоже преходити ю во обувении:

¹⁶и будет прошествие людем моим оставшым во египте, и будет израилю, якоже в день, егда изыде от земли египетския.