Read Елизаветинская Библия, 1751 Исаия 21 Bible Online

Исаия 21 - Елизаветинская Библия, 1751 bible

Исаия 21

¹Якоже буря сквозе пустыню проходит, от пустыни исходящая из земли,

²страшно видение и жестоко поведася мне: преступаяй преступает, и беззаконнуяй беззаконствует: на мя еламите, и послы персстии на мя идут: ныне воздохну и утешу себе.

³Сего ради наполнишася чресла моя разслабления, и болезни прияша мя аки раждающую: неправдовах еже не слышати, потщахся еже не видети.

⁴Сердце мое заблуждает, и беззаконие погружает мя, душа моя стоит во страсе.

⁵Уготовите трапезу, ядите, пийте: воставше, князи, уготовите щиты,

⁶яко тако рече Господь ко мне: шед постави себе стража, и еже аще узриши, возвести.

⁷И узрех всадники конныя два, всадника на осляти и всадника на велблюде. Послушай слушанием многим

⁸и призови урию на стражбу Господню. И рече: стоях выну день, и у полчища аз стоях всю нощь,

⁹и се, сам грядет (муж) всадник двоконный, и отвещав рече: паде, паде вавилон, и вси кумиры его и вся рукотворенная его сокрушишася на земли.

¹⁰Послушайте, оставшиися, и болезнующии, услышите: еже слышах от Господа саваофа, Бог израилев возвести нам.

¹¹Ко мне зови от сиира: стрегите забрала.

¹²Стрегу заутра и нощию. Аще ищеши, ищи и у мене обитай.

¹³В дубраве в вечер преспиши, или на пути деданове.

¹⁴Во сретение жаждущему воду принесите, живущии во стране феманове, со хлебы сретайте бежащыя множества ради убиенных

¹⁵и множества ради заблуждающих, и множества ради мечей и множества ради луков напряженных, и множества ради падших на сечи.

¹⁶Яко сице рече Господь ко мне: еще лето (едино), якоже лето наемника, оскудеет слава сынов кидарских,

¹⁷и останок луков сильных сынов кидарских будет мал, яко Господь Бог израилев глагола.