Read Елизаветинская Библия, 1751 Исаия 24 Bible Online

Исаия 24 - Елизаветинская Библия, 1751 bible

Исаия 24

¹Се, Господь разсыплет вселенную и опустошит ю, и открыет лице ея и расточит живущыя на ней.

²И будут людие аки жрец, и раб аки господин, и раба аки госпожа: будет купуяй яко продаяй, и взаим емляй аки заимодавец, и должный аки емуже есть должен.

³Тлением истлеет земля, и расхищением расхищена будет земля: уста бо Господня глаголаша сия.

⁴Восплакася земля, и растленна бысть вселенная, восплакашася высоцыи земли.

⁵Земля бо беззаконие сотвори живущих ради на ней, понеже преступиша закон и измениша заповеди, разрушиша завет вечный.

⁶Сего ради проклятие пояст землю, яко согрешиша живущии на ней: сего ради убози будут живущии на земли, и останется человеков мало.

⁷Восплачется вино, возрыдает виноград, возстенут вси радующиися душею.

⁸Престало есть веселие тимпанов, преста высокодерзость и богатство нечестивых, престал есть глас гуслей:

⁹усрамишася, не пиша вина, горька бысть сикера пиющым.

¹⁰Опусте всяк град, заключит храм, еже не внити.

¹¹Плачитеся о вине всюду, престала есть радость вся земная, отиде вся радость земли.

¹²И останут гради пусти, и домове оставлени погибнут.

¹³Сия вся будут на земли среди языков: якоже аще кто отрясает масличину, тако отрясут их: и (якоже) аще останет от оымания винограда,

¹⁴сии гласом возопиют: оставшиися же на земли возрадуются со славою Господнею, возмятется вода морская.

¹⁵Сего ради слава Господня во островех будет морских, имя Господне прославлено будет.

¹⁶Господи Боже израилев, от крил земных чудеса слышахом, надежда благочестивому: и рекут: (горе хулящым, иже хулят закон,) горе преступником, иже преступают закон.

¹⁷Страх и пропасть и сеть на вас живущих на земли.

¹⁸И будет, бежай страха впадет в пропасть, и излазяй из пропасти имется в сеть: яко окна с небесе отверзошася, и потрясутся основания земная.

¹⁹Мятежем возмятется земля, и скудостию оскудеет земля.

²⁰Преклонися и потрясеся земля аки овощное хранилище, и аки пиян и шумен падет и не возможет востати, преодоле бо на ней беззаконие.

²¹И будет в той день, наведет Господь на утварь небесную руку и на цари земныя.

²²И соберут собрание ея и затворят в тверди и в темницы: мноземи роды будет посещение их.

²³И истает плинфа и падет стена, и устыдится луна и посрамится солнце: яко воцарится Господь в сионе и во Иерусалиме и пред старейшины славен будет.