Read Елизаветинская Библия, 1751 Исаия 25 Bible Online

Исаия 25 - Елизаветинская Библия, 1751 bible

Исаия 25

¹Господи Боже мой, прославлю тя, воспою имя твое, яко сотворил еси чудная дела, совет древний истинный: да будет, Господи.

²Яко положил еси грады в персть, грады твердыя, еже пасти основанием их, нечестивых град да не созиждется во век.

³Сего ради благословят тя людие нищии, и гради человеков обидимых возблагословят тя.

⁴Был бо еси всякому граду смиренному помощник, и изнемогающым за оскудение покров, от человек злых избавиши их: покров жаждущих, и дух человеков обидимых.

⁵Аки человецы малодушнии жаждущии в сионе, яко избавиши их от человек нечестивых, имже нас предал еси.

⁶И сотворит Господь саваоф всем языком: на горе сей испиют радость, испиют вино,

⁷помажутся миром на горе сей: предаждь сия вся языком: той бо совет на вся языки.

⁸Пожре смерть возмогши, и паки отят Господь Бог всякую слезу от всякаго лица: поношение людий отят от всея земли, уста бо Господня глаголаша (сия).

⁹И рекут в день оный: се, Бог наш, наньже уповахом, и спасет нас: сей Господь, потерпехом его, и возрадовахомся и возвеселихомся о спасении нашем.

¹⁰Покой даст Бог на горе сей, и поперется моавитида, якоже топчут ток колесницами.

¹¹И воздвигнет руце свои, якоже и той смири, еже погубити: и смирит гордыню его, на няже руце возложи.

¹²И высоту убежища ограды твоея смирит, и обнизится даже до земли.