Read Елизаветинская Библия, 1751 Исаия 26 Bible Online

Исаия 26 - Елизаветинская Библия, 1751 bible

Исаия 26

¹В той день воспоют песнь сию в земли иудейстей, глаголюще: се, град крепок, и спасение нам положит стену и ограждение.

²Отверзите врата, да внидут людие хранящии правду и хранящии истину,

³приемлющии истину и хранящии мир.

⁴Яко на тя надеянием надеяшася, Господи, во век, Боже великий, вечный,

⁵иже смирив низвел еси живущыя в высоких: грады крепкия разориши и обнизиши я даже до земли.

⁶И поперут я ноги кротких и смиренных.

⁷Путь благочестивых прав бысть, и приуготован путь благочестивых.

⁸Путь бо Господень суд: уповахом на имя твое и память, еяже желает душа наша.

⁹От нощи утренюет дух мой к тебе, Боже, зане свет повеления твоя на земли: правде научитеся, живущии на земли.

¹⁰Преста бо нечестивый: всяк, иже не научится правде на земли, истины не сотворит: да возмется нечестивый, да не видит славы Господни.

¹¹Господи, высока твоя мышца, и не ведеша, разумевше же постыдятся: ревность приимет люди ненаказанныя, и ныне огнь супостаты пояст.

¹²Господи Боже наш, мир даждь нам, вся бо воздал еси нам.

¹³Господи Боже наш, стяжи ны: Господи, разве тебе иного не вемы: имя твое именуем.

¹⁴Мертвии же живота не имут видети, ниже врачеве воскресят: сего ради навел еси и погубил еси, и взял еси всяк мужеск пол их.

¹⁵Приложи им зла, Господи, приложи зла славным земли.

¹⁶Господи, в скорби помянухом тя, в скорби мале наказание твое нам.

¹⁷И яко болящая приближается родити и в болезни своей воскрича, тако быхом возлюбленному твоему.

¹⁸Страха ради твоего, Господи, во чреве прияхом и поболехом, и родихом дух спасения твоего, егоже сотворихом на земли: не падемся, но падутся вси живущии на земли.

¹⁹Воскреснут мертвии и востанут иже во гробех, и возрадуются иже на земли: роса бо, яже от тебе, изцеление им есть, земля же нечестивых падет.

²⁰Идите, людие мои, внидите во храмину вашу, затворите двери своя, укрыйтеся мало елико елико, дондеже мимоидет гнев Господень.

²¹Се бо, Господь от святаго (места) наводит гнев на живущыя на земли: и открыет земля кровь свою и не покрыет избиеных.