Read Елизаветинская Библия, 1751 Исаия 29 Bible Online

Исаия 29 - Елизаветинская Библия, 1751 bible

Исаия 29

¹Горе граду ариилу, наньже давид воева. Соберите жита от года до года, снесте бо вкупе с моавом:

²озлоблю бо ариила, и будет крепость его и богатство мне:

³и обсяду тя аки давид, и поставлю окрест тебе острог, и согражду столпы.

⁴И смирятся словеса твоя до земли, и в землю внидут словеса твоя: и будет глас твой аки гласящих от земли, и ко земли изнеможет глас твой.

⁵И будет яко персть от колесе богатство нечестивых, и аки прах летяй множество утесняющих тя, и будет аки черта внезапу от Господа саваофа.

⁶Присещение бо будет со громом и с трусом и гласом великим, буря несома и пламень огненный поядаяй.

⁷И будет аки соние видяй во сне нощию, богатство всех языков, елицы воеваша на ариила, и вси, иже воеваша на Иерусалима, и вси собраннии нань и озлобляющии его.

⁸И будут аки во сне ядущии и пиющии, и воставшым, тощь их сон: и якоже во сне жаждай аки пияй, воспрянув же еще жаждет, душа же его вотще надеяся: тако будет богатство всех языков, елицы воеваша на гору сионю.

⁹Разслабейте и ужаснитеся, и упийтеся не сикером, ни вином,

¹⁰яко напои вас Господь духом умиления, и смежит очи их и пророков их и князей их, видящих сокровенная.

¹¹И будут вам вся сия словеса, аки словеса книги запечатленныя сея, юже аще дадут человеку ведущему писания, глаголюще: прочти сие. И речет: не могу прочести, запечатленна бо.

¹²И дастся книга сия в руце человеку не ведущему писания, и речется ему: прочти сие. и речет: не вем писания.

¹³И рече Господь: приближаются мне людие сии усты своими и устнами своими почитают мя, сердце же их далече отстоит от мене: всуе же почитают мя, учаще заповедем человеческим и учением.

¹⁴Сего ради се, аз приложу, еже преселити люди сия, и преставлю я, и погублю премудрость премудрых и разум разумных сокрыю.

¹⁵Горе творящым глубоко совет, а не Господем: горе в тайне совет творящым, и будут во тме дела их, и рекут: кто ны виде, и кто ны уразумеет, яже мы творим?

¹⁶Не якоже ли брение скудельника вменитеся? Еда речет здание создавшему е: не ты мя создал еси? или творение сотворшему: не разумно мя сотворил еси?

¹⁷Не еще ли мало, и приложится ливан, аки гора хермель, и хермель в дубраву вменится?

¹⁸И услышат в день оный глусии словеса книги (сея), и иже во тме и иже во мгле очи слепых узрят.

¹⁹И возрадуются нищии ради Господа в веселии, и отчаявшиися человецы исполнятся веселия.

²⁰Изчезе беззаконник, и погибе гордый, и потребишася вси беззаконнующии во злобе

²¹и творящии согрешати человеки во слове: всем же обличающым во вратех претыкание положат, понеже совратиша в неправдах праведнаго.

²²Сего ради тако глаголет Господь на дом иаковль, егоже определи от авраама: не ныне постыдится иаков, ниже ныне лице свое изменит израиль:

²³но егда увидят чада их дела моя, мене ради освятят имя мое и освятят святаго иаковля, и Бога израилева убоятся.

²⁴И уразумеют заблуждающии духом смысл, и ропщущии научатся послушати, и языцы немотствующии научатся глаголати мир.