Read Елизаветинская Библия, 1751 Исаия 33 Bible Online

Исаия 33 - Елизаветинская Библия, 1751 bible

Исаия 33

¹Горе обидящым васъ! вас никтоже и изобидит, и отвергаяй вас не отвержет: пленени будут отметающии (вас) и предадятся, и яко молие в ризе, тако побеждени будут.

²Господи, помилуй ны, на тя бо уповахом: бысть племя непокаряющихся в пагубу, спасение же наше во время печали.

³Гласом страха твоего ужасошася людие от страха твоего, и разсеяшася языцы.

⁴Ныне же соберутся корысти вашя малаго и великаго: якоже аще кто соберет пруги, тако наругаются вам.

⁵свят Бог живый в вышних, наполнися сион суда и правды.

⁶В законе предадятся, в сокровищих спасение наше, тамо премудрость и хитрость и благочестие ко Господеви: сия суть сокровища правды.

⁷Се, ныне во страсе вашем тии убоятся: ихже боястеся, возопиют от вас: вестницы бо послани будут горце плачущеся, просяще мира.

⁸Опустеют бо сих путие: преста страх языков, и завет иже к ним вземлется, и не вмените их в человеки.

⁹Восплакася земля, посрамлен ливан, блато бысть саронь: явлена будет галилеа и хермель.

¹⁰Ныне воскресну, глаголет Господь, ныне прославлюся, ныне вознесуся.

¹¹Ныне узрите, ныне ощутите, тщетна будет крепость духа вашего: огнь вы пояст.

¹²И будут языцы пожжени, аки терние на ниве разметано и пожжено.

¹³Услышат дальнии, яже сотворих, (глаголет Господь,) уведят приближающиися крепость мою.

¹⁴Отступиша, иже в сионе, беззаконницы, приимет трепет нечестивыя: кто возвестит вам, яко огнь горит? кто возвестит вам место вечное?

¹⁵Ходяй в правде, глаголяй правый путь, ненавидяй беззакония и неправды и руце оттрясаяй от даров: отягчаваяй ушы, да не услышит суда крове: смежаяй очи, да не узрит неправды,

¹⁶сей вселится во высоце пещере камене крепкаго: хлеб ему дастся и вода его верна.

¹⁷Царя со славою узрите, и очи ваши узрят землю издалеча,

¹⁸душа ваша поучится страху Господню: где суть книгочии? где суть совещавающии? где есть изчитаяй питаемыя малы и велики люди?

¹⁹Имже не совещаше, ниже ведяше глубокий глас имущаго, яко не слышати людем уничтоженым, и несть слышащему смысла.

²⁰Се, сион град, спасение наше, очи твои узрят, Иерусалиме, граде богатый, кущы не поколеблются, ниже подвигнутся колие храмины его в вечное время, и ужя его не преторгнутся.

²¹Яко имя Господне велико вам есть, место вам будет, реки и ровенницы широцы и пространни: не пойдеши по сему пути, ниже пойдет корабль пловущь:

²²Бог бо мой велик есть: не минет мене Господь судия наш, Господь Князь наш, Господь Царь наш, Господь той нас спасет.

²³Прервашася ужя твоя, яко не укрепишася: щогла твоя преклонися, не распустит ветрил, не воздвигнет знамения, дондеже предастся на пленение: темже мнози хромии плен сотворят,

²⁴и не рекут: труждаемся, людие живущии в них, оставися бо им грех.