Read Елизаветинская Библия, 1751 Исаия 35 Bible Online

Исаия 35 - Елизаветинская Библия, 1751 bible

Исаия 35

¹Радуйся, пустыня жаждущая, да веселится пустыня и да цветет яко крин.

²И процветет и возвеселится пустыня иорданова: и слава ливанова дадеся ей, и честь кармилова, и узрят людие мои славу Господню и высоту Божию.

³Укрепитеся, руце ослабленыя и колена разслабленая:

⁴утешитеся, малодушнии умом укрепитеся, не бойтеся: се, Бог наш суд воздает и воздаст, той приидет и спасет нас.

⁵Тогда отверзутся очи слепых, и уши глухих услышат.

⁶Тогда скочит хромый яко елень, и ясен будет язык гугнивых: яко проторжеся вода в пустыни и дебрь в земли жаждущей.

⁷И безводная будет во езера, и на жаждущей земли источник водный будет: тамо будет веселие птицам, и селитва трости, и лузи.

⁸И тамо будет путь чист, и путь свят наречется: и не прейдет тамо нечистый, ниже будет тамо путь нечист: разсеяннии же пойдут по нему и не заблудят.

⁹И не будет тамо льва, ни от зверей злых не взыдет нань, ниже обрящется тамо, но пойдут по нему избавленнии:

¹⁰и собраннии Господем обратятся и приидут в сион с радостию, и радость вечная над главою их: над главою бо их хвала и веселие, и радость приимет я, отбеже болезнь и печаль и воздыхание.