Read Елизаветинская Библия, 1751 Исаия 37 Bible Online

Исаия 37 - Елизаветинская Библия, 1751 bible

Исаия 37

¹И бысть егда услыша царь езекиа, растерза ризы и облечеся во вретище и вниде во храм Господень:

²и посла елиакима домостроителя, и сомну книгочия, и старейшины жречески оболчены во вретища ко исаии пророку сыну амосову.

³И рекоша ему: сия глаголет езекиа: день печали и укоризны и обличения и гнева днешний день, понеже прииде болезнь раждающей, крепости же не имеет родити:

⁴да услышит Господь Бог твой словеса рапсакова, яже посла царь ассирийский, господин его, укаряти Бога живаго и поносити словесы, яже слыша Господь Бог твой, и да помолишися ко Господеви Богу твоему о оставшихся сих.

⁵И приидоша отроцы царя езекии ко исаии.

⁶И рече им исаиа: сице рцыте ко господину вашему: сия глаголет Господь: не убойся от словес, яже еси слышал, имиже укориша мя послы царя ассирийска:

⁷се, аз вложу в него дух, и услышав весть возвратится во страну свою и падет мечем на своей земли.

⁸И возвратися рапсак и обрете царя ассирийскаго облежаща ловну: и услыша царь ассирийск, яко отиде от лахиса,

⁹и изыде фарака царь ефиопский воевати нань: и услышав возвратися и посла послы ко езекии, глаголя:

¹⁰сице рцыте езекии царю иудейску: да не прельщает Бог твой тебе, на негоже уповая еси, глаголя, яко не предастся Иерусалим в руце царя ассирийска:

¹¹или не слышал еси ты, что сотвориша царие ассирийстии, како всю землю погубиша, и ты ли избавишися?

¹²еда избавиша сих бози язычестии, ихже погубиша отцы мои гозан и харран и расем, иже суть во стране феемафи?

¹³где суть царие емафовы, и где арфафовы, и где града епфаруема, анагугана?

¹⁴И взя езекиа книгу от послов и прочте ю, и вниде во храм Господень и отверзе ю пред Господем.

¹⁵И помолися езекиа ко Господеви, глаголя:

¹⁶Господи саваоф, Боже израилев, седяй на херувимех, ты еси Бог един Царь всякаго царства вселенныя, ты сотворил еси небо и землю:

¹⁷приклони, Господи, ухо твое, услыши, Господи, отверзи, Господи, очи твои, призри, Господи, и виждь и слыши вся словеса сеннахиримля, яже посла укаряти Бога живаго:

¹⁸поистинне бо, Господи, пусту сотвориша царие ассирийстии всю землю и страны их,

¹⁹и ввергоша кумиры их во огнь, не беша бо бози, но дела рук человеческих, древа и камение, и погубиша я:

²⁰ныне же, Господи Боже наш, спаси ны от руки их, да уведят вся царствия земная, яко ты еси (Господь) Бог един.

²¹И послан бысть исаиа сын амосов ко езекии и рече ему: сия глаголет Господь Бог израилев: слышах, о нихже молился еси ко мне о сеннахириме цари ассирийстем.

²²Сие слово, еже глагола о нем Бог: похули тя и поругася тебе девица дщи сионя, на тя главою покива дщи Иерусалимля:

²³кого укорил и разгневал еси? или к кому возвысил еси глас твой, и не воздвигл еси на высоту очес твоих? ко святому израилеву!

²⁴яко послами укорил еси Господа, ты бо рекл еси: множеством колесниц аз взыдох на высоту гор и на последняя ливана, и посекох высоту кедра его и доброту кипарисову, и внидох в высоту части дубравныя

²⁵и положих мост, и опустоших воды и все собрание водное:

²⁶не слышал ли еси издревле сих, яже аз сотворих? от древних дний совещах, ныне же показах опустошити языки в твердынех и живущыя во твердых градех:

²⁷опустих руце, и изсхоша и быша аки сухо сено на кровех и аки троскот:

²⁸ныне же покой твой и исход твой и вход твой аз вем,

²⁹ярость же твоя, еюже разгневался еси, и огорчение твое взыде ко мне, и вложу брозду в ноздри твоя, и узду во уста твоя, и возвращу тя путем, имже еси пришел.

³⁰Сие же тебе знамение: яждь сего лета, еже еси всеял, а во второе лето, еже от себе растет: а в третие насеявше пожнете и насадите винограды и снесте плоды их:

³¹и будут оставшии во иудеи, прорастят корение долу и сотворят в верх плод,

³²яко от Иерусалима будут оставшиися и спасшиися от горы сиони: ревность Господа саваофа сотворит сия.

³³Сего ради тако глаголет Господь на царя ассирийска: не внидет в сей град, ниже пустит нань стрелу, ниже возложит нань щита, ниже оградит окрест его ограждения:

³⁴но путем, имже прииде, темже возвратится, и во град сей не внидет. Сия глаголет Господь:

³⁵защищу град сей, еже спасти его мене ради и ради давида раба моего.

³⁶И изыде ангел Господень и изби от полка ассирийска сто осмьдесят пять тысящ. И воставше заутра, обретоша вся телеса мертва.

³⁷И отиде возвращься сеннахирим царь ассирийский и вселися во ниневии.

³⁸И внегда покланятися ему и в дому насараху отечествоначалнику своему, адрамелех и сарасар сынове его убиста его мечьми, сами же убежаста во армению. И воцарися асордан сын его вместо его.