Read Елизаветинская Библия, 1751 Исаия 41 Bible Online

Исаия 41 - Елизаветинская Библия, 1751 bible

Исаия 41

¹Обновляйтеся ко мне, острови князи бо изменят крепость: да приближатся и да глаголют вкупе, тогда суд да возвещают.

²Кто возстави от восток правду, призва ю к ногам своим, и пойдет? даст пред языки, и цари ужасит: и повержет на землю мечы их, и аки стеблие отвержени луцы их,

³и проженет я, и пройдет с миром путь ног его.

⁴Кто содела и сотвори сия, призва ю призываяй ю от начала родов. Аз Бог первый, и в грядущая аз есмь.

⁵Видеша языцы и убояшася, концы земнии приближишася и приидоша вкупе.

⁶Судяй кийждо ближнему, и брату помощи, и речет:

⁷превозможе муж древоделатель и ковачь бияй млатом, вкупе проковаяй: овогда убо речет: спаяние добро есть, утвердиша я гвоздьми, положат я, и не подвигнутся.

⁸Ты же, израилю, рабе мой, иакове, егоже избрах, семя авраамле, егоже бозлюбих,

⁹егоже поях от конец земли, и от стражб ея призвах тя, и рекох ти: раб мой еси, избрах тя, и не оставих тебе:

¹⁰не бойся, с тобою бо есмь, не прельщаю: аз бо есмь Бог твой, укрепивый тя, и помогох ти, и утвердих тя десницею моею праведною:

¹¹се, постыдятся и посрамятся вси сопротивляющиися тебе, будут бо яко не сущии, и погибнут вси соперницы твои:

¹²взыщеши их, и не обрящеши человеков, иже поругаются тебе: будут бо аки не бывшии и не будут ратующии тебе.

¹³Яко аз Бог твой держай десницу твою, глаголяй тебе:

¹⁴не бойся, иакове, малый израилю, аз помогох ти, глаголет Бог твой, избавляяй тя святый израилев:

¹⁵се, сотворих тя аки колеса колесничная новая, стирающая аки пила, и сотреши горы, и истончиши холмы, и аки прах положиши,

¹⁶и извееши, и ветр возмет я, и буря развеет я: ты же возвеселишися во святых израилевых.

¹⁷И возрадуются убозии и неимущии: поищут бо воды, и не будет, язык их от жажди изсше. Аз Господь Бог, аз услышу их, Бог израилев, и не оставлю их,

¹⁸но отверзу на горах реки и среди поля источники, сотворю пустыню в луги водныя и жаждущую землю в водотечы,

¹⁹положу в безводную землю кедр и смерчие, и мирсину и кипарис и тополю:

²⁰да узрят и уразумеют, и помыслят и уведят вкупе, яко рука Господня сотвори сия вся, и святый израилев показа.

²¹Приближается суд ваш, глаголет Господь Бог: приближишася совети ваши, глаголет Царь иаковль.

²²Да приближатся и возвестят вам, яже сбудутся, или яже прежде быша, рцыте: и приставим ум и уразумеем, что последняя и будущая: рцыте нам,

²³возвестите нам грядущая на последок, и увемы, яко бози есте: благо сотворите и зло сотворите, и почудимся и узрим вкупе.

²⁴Яко откуду есте вы, и откуду дело ваше? от земли мерзость избраша вас.

²⁵Аз же возставих, иже от севера и иже от восток солнечных прозовутся именем моим: да приидут князи, и яко брение скудельника и яко скудельник топчущь брение, тако попрани будете.

²⁶Кто бо возвестит, яже исперва, да увемы, яже напреди, и речем, яко истинна суть? несть предглаголющаго, ни слышащаго словес ваших.

²⁷Начало сиону дам и Иерусалима утешу на пути.

²⁸От язык бо, се, ни един и от кумир их несть возвещаяй. И аще вопрошу их, откуду есте? не отвещают ми.

²⁹Суть бо творящии вас и всуе прельщающии вас.