Read Елизаветинская Библия, 1751 Исаия 42 Bible Online

Исаия 42 - Елизаветинская Библия, 1751 bible

Исаия 42

¹Иаков отрок мой, восприиму и: израиль избранный мой, прият его душа моя, дах дух мой нань, суд языком возвестит:

²не возопиет ниже ослабит, ниже услышится вне глас его:

³трости сокрушены не сотрет и льна курящася не угасит, но во истину изнесет суд:

⁴возсияет и не потухнет, дондеже положит на земли суд, и на имя его языцы уповати имут.

⁵Тако глаголет Господь Бог, сотворивый небо и водрузивый е, утверждей землю и яже на ней, и даяй дыхание людем, иже на ней, и дух ходящым на ней:

⁶аз Господь Бог призвах тя в правде, и удержу за руку твою и укреплю тя: и дах тя в завет рода израилева, во свет языков,

⁷отверсти очи слепых, извести от уз связанныя и из дому темницы и седящыя во тме.

⁸Аз Господь Бог, сие мое есть имя, славы моея иному не дам, ниже добродетелей моих истуканным.

⁹Иже из начала, се, приидоша, и новая, яже аз возвещу, и прежде неже возвестити, явишася вам.

¹⁰Воспойте Господеви песнь нову: началство его, прославите имя его от конец земли, сходящии в море и плавающии по нему, острови и живущии на них.

¹¹Возвеселися, пустыне, и веси ея, придвория, и живущии в кидаре: возвеселятся живущии на камени, от края гор возопиют,

¹²дадят Богу славу, добродетели его во островех возвестят.

¹³Господь Бог сил изыдет и сокрушит рать, воздвигнет рвение и возопиет на враги своя со крепостию.

¹⁴Молчах, еда и всегда умолчу и потерплю? Терпех яко раждающая, истреблю и изсушу вкупе,

¹⁵опустошу горы и холмы, и всяку траву их изсушу, и положу реки во островы, и луги изсушу:

¹⁶и наведу слепыя на путь, егоже не видеша, и по стезям, ихже не знаша, ходити сотворю им: сотворю им тму во свет и стропотная в правая: сия глаголы сотворю, и не оставлю их.

¹⁷Тии же возвратишася вспять: посрамитеся стыдением, уповающии на изваянная, глаголющии слиянным: вы есте бози наши.

¹⁸Глусии, услышите, и слепии, прозрите видети.

¹⁹И кто слеп, разве раби мои? и глуси, разве владеющии ими? и ослепоша раби Божии.

²⁰Видесте многажды, и не сохранисте: отверсты ушы (имуще), и не слышасте.

²¹Господь Бог восхоте, да оправдится и возвеличит хвалу.

²²И видех, и быша людие расхищени и разграблени: пругло бо в ложах везде, и в домех вкупе, идеже скрыша я, быша в плен: и не бысть изимаяй разграбления и не бе глаголющаго: отдаждь.

²³Кто в вас, иже внушит сия? и услышит во грядущая.

²⁴Кто даде на разграбление иакова, и израиля пленяющым его? не Бог ли, емуже согрешиша и не восхотеша в путех его ходити, ни слушати закона его?

²⁵И наведе на ня гнев ярости своея, и укрепися на ня рать, и палящии их окрест, и не уведеша кийждо их, ниже положиша на уме.