Read Елизаветинская Библия, 1751 Исаия 44 Bible Online

Исаия 44 - Елизаветинская Библия, 1751 bible

Исаия 44

¹Ныне же слыши, рабе мой иакове, и израилю, егоже избрах.

²Сице глаголет Господь Бог сотворивый тя и создавый тя из утробы: еще поможет ти: не бойся, рабе мой иакове, и возлюбленный израилю, егоже избрах.

³Яко аз дам воду в жажду ходящым в безводней, наложу дух мой на семя твое и благословения моя на чада твоя,

⁴и прозябнут аки трава посреде воды и яко верба при воде текущей.

⁵Сей речет: Божий есмь: и сей возопиет о имени иаковли, и другий напишет рукою своею: Божий есмь: и о имени израилеве возопиет.

⁶Сице глаголет Бог Царь израилев, и избавлей его Бог саваоф: аз первый и аз по сих, кроме мене несть Бога:

⁷кто якоже аз? да станет и да призовет, и да возвестит и да уготовит ми, отнележе сотворих человека во век, и грядущая прежде неже приити им, да возвестят вам.

⁸Не укрывайтеся, ниже заблуждайте: не исперва ли внушисте, и возвестих вам? свидетелие вы есте, аще есть Бог разве мене.

⁹И не послушаша тогда созидающии, и ваяющии вси тщетни, творящии желания своя, яже не упользуют их:

¹⁰но посрамятся вси созидающии бога и ваяющии вси неполезная.

¹¹И вси, отнюдуже быша, изсхоша: и глусии от человек да соберутся вси и да станут вкупе, и да посрамятся и устыдятся вкупе.

¹²Яко наостри древоделатель сечиво, теслою содела оное, и свердлом состави е, и длатом издолбе е, и содела е крепостию мышцы своея: и взалчет, и изнеможет, и не напиется воды.

¹³И избрав древоделя древо, постави в меру, и клеем сострои е, и сотвори е аки образ мужеск и аки красоту человечу, поставити е в дому.

¹⁴Посече древо в дубраве, еже насади Господь, сосну, и дождь возрасти,

¹⁵да будет человеком на жжение: и взяв от него, согреся, и изжегше я, испекоша ими хлебы, из оставшаго же сотвориша боги и покланяются им: сотвори е изваянное, и прекланяется им.

¹⁶Пол его сожже огнем, и пол его сожже на углие, и испече в них хлебы, и на них испече мясо, и яде, и насытися, и согревся рече: сладко мне, яко согрехся и видех огнь.

¹⁷Из оставшаго же сотвори бога изваянна, прекланяется ему и покланяется, и молится ему глаголя: избави мя, яко бог мой еси ты.

¹⁸Не уведаша смыслити, яко отемнеша очи их еже видети и разумети сердцем своим.

¹⁹И не помысли в души своей, ни уведе смышлением, яко пол его сожже огнем, и испече на углиех его хлебы, и испек мяса снеде, и оставшее его в мерзость сотвори, и покланяются ему.

²⁰Увеждь, яко пепел есть сердце их, и прельщаются, и ни един может души своея избавити: видите, не рцыте, яко лжа в деснице моей.

²¹Помяни сия, иакове и израилю, яко раб мой еси ты, сотворих тя раба моего, и ты, израилю, не забывай мене.

²²Се бо, отях яко облак беззакония твоя и яко примрак грехи твоя: обратися ко мне, и избавлю тя.

²³Возвеселитеся, небеса, яко помилова Бог израиля: вострубите, основания земная, возопийте, горы, веселие, холми и вся древеса, яже на них: яко избави Бог иакова, и израиль прославится.

²⁴Сице глаголет Господь избавляяй тя и создавый тя от чрева: аз Господь совершаяй вся, распрострох небо един и утвердих землю.

²⁵Кто ин разсыплет знамения чревоволшебников и волшбы от сердца, отвращаяй мудрыя вспять и советы их обуяяй,

²⁶и уставляя глагол раба своего, и совет вестников своих истинен творяй? глаголяй Иерусалиму: населишися: и градом иудейским: возградитеся, и пустыни его просияют,

²⁷глаголяй бездне: опустееши, и реки твоя изсушу,

²⁸глаголяй киру смыслити, и вся воли моя сотворит: глаголяй Иерусалиму: возградишися, и храм святый мой осную.