Read Елизаветинская Библия, 1751 Исаия 45 Bible Online

Исаия 45 - Елизаветинская Библия, 1751 bible

Исаия 45

¹Сице глаголет Господь Бог помазанному моему киру, егоже удержах за десницу, повинути пред ним языки, и крепость царей разрушу, отверзу пред ним врата, и гради не злтворятся:

²аз пред тобою пойду и горы уравню, врата медяная сокрушу и вереи железныя сломлю,

³и дам ти сокровища темная сокровенная: невидимая отверзу тебе, да увеси, яко аз Господь Бог твой прозывая имя твое, Бог израилев.

⁴Ради раба моего иакова и израиля избраннаго моего, аз прозову тя именем твоим и прииму тя:

⁵ты же не познал еси мене, яко аз Господь Бог, и несть разве мене еще Бога: укрепих тя, и не познал еси мене,

⁶да быша уведели, иже от восток солнечных и иже от запад, яко несть Бог разве мене: аз Господь Бог, и несть еще.

⁷Аз устроивый свет и сотворивый тму, творяй мир и зиждяй злая, аз Господь Бог, творяй сия вся.

⁸Да возрадуется небо свыше, и облацы да кропят правду: да прозябнет земля, и да прорастит милость, и правду да прозябнет вкупе: аз есмь Господь создавый тя.

⁹Что лучшее устроих яко глину скудельничу? еда оряй орати будет землю весь день? еда речет брение скудельнику: что твориши, яко не делаеши, ниже имаши рук? еда отвещает здание создавшему е?

¹⁰еда глаголет отцу: что родиши? и матери: что чревоболиши?

¹¹Яко тако глаголет Господь Бог, святый израилев, сотворивый грядущая: вопросите мене о сынех моих и о дщерех моих, и о делех руку моею заповедите мне.

¹²Аз сотворих землю и человека на ней, аз рукою моею утвердих небо, аз всем звездам заповедах.

¹³Аз возставих его со правдою царя, и вси путие его правы: сей созиждет град мой и пленение людий моих возвратит, не по мзде, ни по даром, рече Господь саваоф.

¹⁴Тако глаголет Господь саваоф: утрудися египет и купли ефиопския, и саваимстии мужие высоцыи к тебе прейдут и тебе будут раби, и вслед тебе пойдут связани узами ручными, и прейдут к тебе и поклонятся тебе, и в тебе помолятся, яко в тебе Бог есть, и рекут: несть Бога разве тебе:

¹⁵ты бо еси Бог, и не ведехом, Бог израилев спас.

¹⁶Постыдятся и посрамятся вси противящиися ему и пойдут в студе: обновляйтеся ко мне, острови.

¹⁷Израиль спасается от Господа спасением вечным: не постыдятся, ни посрамятся даже до века ктому.

¹⁸Зане тако глаголет Господь сотворивый небо, сей Бог показавый землю и сотворивый ю, той раздели ю, не вотще сотвори ю, но на вселение созда ю: аз есмь Господь, и несть ктому.

¹⁹Не отай глаголах, ни в темне месте земли: не рекох племени иаковлю: суетнаго взыщите. Аз есмь, аз есмь Господь глаголяй правду и возвещаяй истину.

²⁰Соберитеся и приидите, совещайтеся вкупе, спасаемии от язык. Не разумеша воздвижущии древо изваяние свое и молящеся богом, иже не спасают.

²¹Аще возвестят, да приближатся, да уведят вкупе, кто слышана сотвори сия исперва? Тогда возвестися вам: аз Бог, и несть иного разве мене, праведен и спаситель, несть кроме мене.

²²Обратитеся ко мне и спасетеся, иже от края земнаго: аз есмь Бог, и несть иного.

²³Кленуся мною самим, аще не изыдет изо уст моих правда, словеса моя не возвратятся: яко мне поклонится всяко колено, и исповестся всяк язык Богови, глаголя:

²⁴правда и слава к нему приидет: и посрамятся вси отлучающиися.

²⁵От Господа оправдятся, и о Бозе прославится все семя сынов израилевых.