Read Елизаветинская Библия, 1751 Исаия 46 Bible Online

Исаия 46 - Елизаветинская Библия, 1751 bible

Исаия 46

¹Паде вил, сокрушися дагон, быша ваяния их во звери и скоты: носите я связана яко бремя труждающемуся и разслабевшу,

²и алчущу и не могущу вкупе, иже не возмогут спастися от рати, сами же пленени приведошася.

³Послушайте мене, доме иаковль и весь останок израилев, носимии от чрева и наказуемии от детска даже до старости:

⁴аз есмь, и дондеже состареетеся, аз есмь, аз терплю вам, аз сотворих и аз понесу, аз подиму и спасу вы.

⁵Кому мя уподобисте? видите, ухитрите, заблуждающии,

⁶слагающии злато из меха, и сребро весом поставляют в мериле, и наемше златаря сотвориша рукотворенная, и преклоншеся покланяются им:

⁷воздвижут я на рамех и ходят: аще же положат я на месте своем, ту лежат, ниже подвижутся: и иже аще возопиет к ним, не услышат, от бед не спасут его.

⁸Помяните сия и возстените, покайтеся, прельстившиися, обратитеся сердцем

⁹и помяните первая от века, яко аз есмь Бог, и несть еще разве мене:

¹⁰возвещаяй первее последняя, прежде неже быти им, и абие сбышася: и рекох: весь совет мой станет, и вся, елика совещах, сотворю.

¹¹Призываяй от восток птицу, и от земли издалеча, о нихже совещах: рекох и приведох, создах и сотворих, приведох и и благопоспеших путь его.

¹²Послушайте мене, погубльшии сердце, сущии далече от правды:

¹³приближих правду мою, и не удалится, и спасение, еже от мене, не умедлю: дах в сионе спасение израилю во прославление.