Read Елизаветинская Библия, 1751 Исаия 48 Bible Online

Исаия 48 - Елизаветинская Библия, 1751 bible

Исаия 48

¹Услышите сия, доме иаковль, прозваннии именем израилевым и изшедшии из иуды, кленущиися именем Господа Бога израилева, поминающии не со истиною, ниже со правдою,

²и придержащиися имени града святаго, и о Бозе израилеве подтверждающиися: Господь саваоф имя ему.

³Преждняя еще возвестих, и из уст моих изыдоша, и слышано бысть: внезапу сотворих, и найде.

⁴Вем, яко жесток еси, и жила железна выя твоя, и чело твое медяно.

⁵И возвестих ти, яже древле, прежде неже приити на тя: слышана тебе сотворих, да не когда речеши, яко идоли мне сия сотвориша, и не рцы, яко изваянная и слиянная заповедаша мне.

⁶Слышасте вся, и вы не разуместе: но и слышана тебе сотворих новая отныне, яже имут быти:

⁷и не рекл еси: ныне бывают, а не прежде, и не в преждния дни слышал еси сия: не рцы: ей, вем сия.

⁸Не ведел еси, ниже разумел еси, ниже исперва отверзох ушеса твоя: ведех бо, яко отвергая отринеши и беззаконник еще от чрева прозовешися.

⁹Имене моего ради покажу ти ярость мою, и славная моя наведу на тя, да не потреблю тебе.

¹⁰Се, продах тя не сребра ради: изях же тя из пещи убожества.

¹¹Мене ради сотворю ти, яко мое имя оскверняется, и славы моея иному не дам.

¹²Послушай мене, иакове и израилю, егоже аз призываю: аз есмь первый и аз есмь во век.

¹³И рука моя основа землю, и десница моя утверди небо: призову я, и станут вкупе,

¹⁴и соберутся вси и услышат: кто им возвести сия? любя тя сотворих волю твою над вавилоном, еже отяти племя халдейско.

¹⁵Аз глаголах, аз призвах, приведох и, и благопоспешит путь его.

¹⁶Приступите ко мне и слышите сия, исперва не отай глаголах: егда бываху, тамо бех, и ныне Господь Господь посла мя и дух его.

¹⁷Тако глаголет Господь, избавивый тя, святый израилев: аз есмь Господь Бог твой, научих тя, еже обрести тебе путь, по немуже пойдеши.

¹⁸И аще бы еси послушал заповедий моих, то был бы убо аки река мир твой, и правда твоя яко волна морская,

¹⁹и было бы яко песок семя твое, и изчадия чрева твоего яко персть земли: ниже ныне потребишися, ниже погибнет имя твое предо мною.

²⁰Изыди от вавилона, бежай от халдеев: глас радости возвестите, и да слышано будет сие, возвестите даже до последних земли, глаголите: избави Господь раба своего иакова.

²¹И аще вжаждут, пустынею проведет их и воду из камене изведет им: разсядется камень, и потечет вода, и испиют людие мои.

²²Несть радоватися нечестивым, глаголет Господь.