Read Елизаветинская Библия, 1751 Исаия 49 Bible Online

Исаия 49 - Елизаветинская Библия, 1751 bible

Исаия 49

¹Послушайте мене, острови, и внемлите, языцы. Временем многим стояти будет, глаголет Господь: от чрева матере моея нарече имя мое,

²и положи уста моя яко мечь остр, и под кровом руки своея скры мя: положи мя яко стрелу избранну, и в туле своем скры мя,

³и рече ми: раб мой еси ты, израилю, и в тебе прославлюся.

⁴Аз же рекох: вотще трудихся, всуе и ни во что дах крепость мою: сего ради суд мой пред Господем и труд мой пред Богом моим.

⁵И ныне тако глаголет Господь, создавый мя от чрева раба себе, еже собрати иакова к нему и израиля: соберуся и прославлюся пред Господем, и Бог мой будет мне крепость.

⁶И рече ми: велие ти есть, еже назватися тебе рабом моим, еже возставити племена иаковля и разсеяние израилево обратити: се, дах тя в завет рода, во свет языком, еже быти тебе во спасение даже до последних земли.

⁷Тако глаголет Господь, избавивый тя Бог израилев: освятите уничижающаго душу свою, гнушаемаго от язык рабов княжеских: царие узрят его, и востанут князи и поклонятся ему Господа ради, яко верен есть святый израилев, и избрах тя.

⁸Тако глаголет Господь: во время приятно послушах тебе и в день спасения помогох ти, и сотворих тя и дах тя в завет вечный языков, еже устроити землю и наследити наследия пустыни,

⁹глаголюща сущым во узах: изыдите, и сущым во тме: открыйтеся. На всех путех пастися будут, и на всех стезях пажить их:

¹⁰не взалчут, ниже вжаждут, ниже поразит их зной, ниже солнце, но милуяй их утешит их и сквозе источники водныя проведет их.

¹¹И положу всяку гору в путь и всяку стезю в паству им.

¹²Се, сии издалеча приидут, сии от севера и от моря, инии же от земли персския.

¹³Радуйтеся, небеса, и веселися, земле, да отрыгнут горы веселие и холми правду, яко помилова Бог люди своя и смиренныя людий своих утеши.

¹⁴Рече же сион: остави мя Господь, и Бог забы мя.

¹⁵Еда забудет жена отроча свое, еже не помиловати изчадия чрева своего? аще же и забудет сих жена, но аз не забуду тебе, глаголет Господь.

¹⁶Се, на руках моих написах стены твоя, и предо мною еси присно,

¹⁷и вскоре возградишися, от нихже разорился еси, и опустошившии тя изыдут из тебе.

¹⁸Возведи окрест очи твои и виждь вся, се, собрашася приидоша к тебе, живу аз, глаголет Господь: яко всеми ими аки в красоту облечешися и обложиши себе ими яко утварию невеста.

¹⁹Понеже пустая твоя и разсыпаная и падшая ныне утеснеют от обитающих, и удалятся от тебе поглощающии тя.

²⁰Рекут бо во ушы твои сынове твои, ихже был погубил еси: тесно ми место, сотвори ми место, да вселюся.

²¹И речеши в сердцы своем: кто мне породи сих? аз же безчадна и вдова, сих же кто воспита мне? аз же остахся едина, сии же мне где быша?

²²Тако глаголет Господь Господь: се, воздвизаю на языки руку мою и на островы воздвигну знамение мое, и приведут сыны твоя в лоне и дщери твоя на плещах возмут.

²³И будут царие кормителие твои, и княгини их кормилицы твоя: до лица земли поклонятся тебе и прах ног твоих оближут, и увеси, яко аз Господь Бог, и не посрамятся терпящии мя.

²⁴Еда возмет кто от исполина корысти? и аще кто пленит неправедне, спасетлися?

²⁵Зане тако глаголет Господь: аще кто пленит исполина, возмет корысти: вземляй же от крепкаго спасется: аз же прю твою разсужду и аз сыны твоя избавлю:

²⁶и оскорбившии тебе снедят плоть свою и испиют яко вино ново кровь свою, и упиются: и увесть всяка плоть, яко аз Господь избавивый тя и заступаяй крепость иаковлю.