Read Елизаветинская Библия, 1751 Исаия 50 Bible Online

Исаия 50 - Елизаветинская Библия, 1751 bible

Исаия 50

¹Тако глаголет Господь: кая книга отпущения матере вашея, еюже отпустих ю? или коему заимодавцу продах вы? се, грехми вашими продастеся, и беззаконий ради ваших отпустих матерь вашу.

²Что яко приидох, и не бяше человека? звах, и не бе послушающаго? еда не может рука моя избавити, или не могу изяти? се, запрещением моим опустошу море и положу реки пусты, и изсхнут рыбы их не сущей воде и умрут жаждею:

³облеку небо во тму и положу аки вретище одежду его.

⁴Господь Господь дает мне язык научения, еже разумети, егда подобает рещи слово: положи мя утро утро, приложи ми ухо, еже слышати,

⁵и наказание Господне отверзает ушы мои: аз же не противлюся, ни противоглаголю.

⁶Плещы мои вдах на раны и ланите мои на заушения, лица же моего не отвратих от студа заплеваний,

⁷и Господь Господь помощник ми бысть: сего ради не усрамихся, но положих лице свое аки твердый камень и разумех, яко не постыждуся:

⁸зане приближается оправдавый мя. Кто пряйся со мною? да сопротивостанет мне купно. И кто судяйся со мною? да приближится ко мне.

⁹Се, Господь Господь поможет ми: кто озлобит мя? Се, вси вы яко риза обетшаете, и яко молие изяст вы.

¹⁰Кто в вас бояйся Господа? да послушает гласа отрока его. Ходящии во тме, и несть им света, надейтеся на имя Господне и утвердитеся о Бозе.

¹¹Се, вси вы огнь раждизаете и укрепляете пламень: ходите светом огня вашего и пламенем, егоже разжегосте. Мене ради быша сия вам, в печали успнете.