Read Елизаветинская Библия, 1751 Исаия 52 Bible Online

Исаия 52 - Елизаветинская Библия, 1751 bible

Исаия 52

¹Востани, востани, сионе, облецыся во крепость твою, сионе, и ты облецыся во славу твою, Иерусалиме, граде святый, ктому не приложит проити сквозе тя необрезанный и нечистый.

²Истряси прах и востани, сяди, Иерусалиме, совлецы узу выи твоея, плененая дщи сионя.

³Яко сия глаголет Господь: туне продани бысте, и не сребром избавитеся.

⁴Тако глаголет Господь: во египет снидоша людие мои прежде, еже пришелцем быти тамо, и во ассирию нуждею отведошася.

⁵И ныне что зде есте? сия глаголет Господь: яко взяшася людие мои туне, чудитеся и плачитеся. Тако глаголет Господь: вас ради присно имя мое хулится во языцех.

⁶Сего ради познают людие мои имя мое в той день, яко аз есмь сам глаголяй, ту есмь.

⁷Коль красны на горах ноги благовествующих мир, благовествующих благая, яко слышано сотворю спасение твое, глаголя: сионе, воцарится Бог твой.

⁸Яко глас хранящих тя вознесеся, и гласом вкупе возрадуются: яко очи ко очесем воззрят, егда помилует Господь сиона.

⁹Да отрыгнут веселие вкупе пустыни Иерусалимския, яко помилова Господь людий своих и избави Иерусалима:

¹⁰и открыет Господь мышцу свою святую пред всеми языки, и узрят вси концы земли спасение, еже от Бога нашего.

¹¹Отступите, отступите, изыдите отсюду и нечистоте не прикасайтеся, изыдите от среды его, отлучитеся, носящии сосуды Господни:

¹²яко не с мятежем изыдете, ниже убежанием пойдете: пойдет бо пред вами Господь, и собираяй вы Господь Бог израилев.

¹³Се, уразумеет отрок мой и вознесется и прославится зело.

¹⁴Якоже ужаснутся о тебе мнози, тако обезславится от человек вид твой, и слава твоя от сынов человеческих.

¹⁵Тако удивятся языцы мнози о нем, и заградят царие уста своя: яко, имже не возвестися о нем, узрят, и иже не слышаша, уразумеют.