Read Елизаветинская Библия, 1751 Исаия 54 Bible Online

Исаия 54 - Елизаветинская Библия, 1751 bible

Исаия 54

¹Возвеселися, неплоды, нераждающая возгласи и возопий, нечревоболевшая, яко многа чада пустыя паче, нежели имущия мужа.

²Рече бо Господь: разшири место, кущи твоея и покровов твоих, водрузи, не пощади, продолжи ужя твоя и колие твое укрепи,

³еще на десно и на лево простри: и семя твое языки наследит, и грады опустевшыя населиши.

⁴Не бойся, яко посрамлена еси, ниже устыдися, яко укорена еси: понеже срамоту вечную забудеши и укоризны вдовства твоего не помянеши ктому.

⁵Яко Господь творяй тя, Господь саваоф имя ему: и избавивый тя святый Бог израилев, всей земли прозовется.

⁶Не яко жену оставлену и малодушну призва тя Господь, ниже яко жену из юности возненавидену, рече Бог твой.

⁷На время мало оставих тя, а с милостию великою помилую тя:

⁸во ярости мале отвратих лице мое от тебе, но милостию вечною помилую тя, рече избавивый тя Господь.

⁹От воды, яже при нои, сие ми есть, якоже кляхся ему во время оно на землю, не разгневатися о тебе ктому, ниже во прещении твоем

¹⁰горы преставити, и холми твои не предвигнутся: тако ниже, яже от мене к тебе, милость оскудеет, ниже завет мира твоего преставится: рече бо милостив к тебе Господь.

¹¹Смиренная и колеблемая не имела еси утешения: се, аз уготовляю тебе анфракс камень твой и на основание твое сапфир:

¹²и положу забрала твоя иаспис, и врата твоя камение кристалла, и ограждение твое камение избранное,

¹³и вся сыны твоя научены Богом, и во мнозе мире чада твоя.

¹⁴И правдою возградишися: удалися от иеправеднаго, и не убоишися, и трепет не приближится тебе.

¹⁵Се, пришелцы приидут к тебе мною и вселятся у тебе и к тебе прибегнут.

¹⁶Се, аз создах тя, не якоже кузнец раздуваяй углие и износя сосуд на дело: аз же создах тя не на пагубу, еже истлити.

¹⁷Всяк сосуд соделан на тя не благопоспешу, и всяк глас, иже на тя востанет на прю, одолееши им всем: повиннии же твои будут в нем Есть наследие служащым Господеви, и вы будете мне праведни, глаголет Господь.