Read Елизаветинская Библия, 1751 Исаия 55 Bible Online

Исаия 55 - Елизаветинская Библия, 1751 bible

Исаия 55

¹Жаждущии, идите на воду, и елицы не имате сребра, шедше купите, и ядите (и пийте) без сребра и цены вино и тук.

²Вскую цените сребро не в хлебы, и труд ваш не в сытость? Послушайте мене, и снесте благая, и насладится во благих душа ваша.

³Внемлите ушима вашима и последуйте путем моим: послушайте мене, и жива будет во благих душа ваша, и завещаю вам завет вечен, преподобная давидова верная.

⁴Се, свидетелство во языцех дах его, князя и повелителя языком.

⁵Се, языцы, иже не ведяху тебе, призовут тя, и людие, иже не познаша тебе, ко тебе прибегнут ради Господа Бога твоего, святаго израилева, яко прослави тя.

⁶Взыщите Господа, и внегда обрести вам того, призовите: егда же приближится к вам,

⁷да оставит нечестивый пути своя, и муж беззаконен советы своя, и да обратится ко Господу, и помилован будет, яко попремногу оставит грехи вашя.

⁸Не суть бо совети мои якоже совети ваши, ниже якоже путие ваши путие мои, глаголет Господь.

⁹Но якоже отстоит небо от земли, тако отстоит путь мой от путий ваших, и помышления ваша от мысли моея.

¹⁰Якоже бо аще снидет дождь или снег с небесе, и не возвратится, дондеже напоит землю, и родит, и прозябнет, и даст семя сеющему и хлеб в снедь:

¹¹тако будет глагол мой, иже аще изыдет из уст моих, не возвратится ко мне тощь, дондеже совершит (вся), елика восхотех, и поспешу пути твоя и заповеди моя.

¹²Со веселием бо изыдете и с радостию научитеся: горы бо и холми возскачут ждуще вас с радостию, и вся древеса селная восплещут ветвьми:

¹³и вместо драчия взыдет кипарис, и вместо кропивы взыдет мирсина: и будет Господь во имя и во знамение вечное, и не оскудеет.