Read Елизаветинская Библия, 1751 Исаия 58 Bible Online

Исаия 58 - Елизаветинская Библия, 1751 bible

Исаия 58

¹Возопий крепостию и не пощади: яко трубу возвыси глас твой и возвести людем моим грехи их и дому иаковлю беззакония их.

²Мене день от дне ищут и разумети пути моя желают, яко людие правду сотворившии и суда Бога своего не оставившии: просят ныне у мене суда праведна и приближитися ко Господу желают, глаголюще:

³что яко постихомся, и не увидел еси? смирихом душы нашя, и не уведел еси? Во дни бо пощений ваших обретаете воли вашя, и вся подручныя вашя томите:

⁴аще в судех и сварех поститеся и биете пястьми смиреннаго, вскую мне поститеся якоже днесь, еже услышану быти с воплем гласу вашему?

⁵Не сицеваго поста аз избрах и дне, еже смирити человеку душу свою: ниже аще слячеши яко серп выю твою, и вретище и пепел постелеши, ниже тако наречете пост приятен.

⁶Не таковаго (бо) поста аз избрах, глаголет Господь: но разрешай всяк соуз неправды, разрушай обдолжения насильных писаний, отпусти сокрушенныя во свободу и всякое писание неправедное раздери:

⁷раздробляй алчущым хлеб твой и нищыя безкровныя введи в дом твой: аще видиши нага, одей, и от свойственных племене твоего не презри.

⁸Тогда разверзется рано свет твой, и изцеления твоя скоро возсияют, и предидет пред тобою правда твоя, и слава Божия оымет тя.

⁹Тогда воззовеши, и Бог услышит тя, и еще глаголющу ти, речет: се, приидох. Аще отимеши от себе соуз и рукобиение и глагол роптания

¹⁰и даси алчущему хлеб от души твоея и душу смиренную насытиши, тогда возсияет во тме свет твой, и тма твоя будет яко полудне,

¹¹и будет Бог твой с тобою присно: и насытишися, якоже желает душа твоя, и кости твоя утучнеют, и будут яко вертоград напоен, и яко источник, емуже не оскуде вода: и кости твоя прозябнут яко трава, и разботеют, и наследят роды родов.

¹²И созиждутся пустыни твоя вечныя, и будут основания твоя вечная родом родов: и прозовешися здатель оград, и стези твоя посреде упокоиши.

¹³Аще отвратиши ногу твою от суббот, еже не творити хотений твоих в день святый, и прозовеши субботы сладостны, святы Богови твоему: не воздвигнеши ноги своея на дело, ниже возглаголеши словесе во гневе из уст твоих,

¹⁴и будеши уповая на Господа, и возведет тя на благоты земныя, и ухлебит тя наследием иакова отца твоего: уста бо Господня глаголаша сия.