Read Елизаветинская Библия, 1751 Исаия 6 Bible Online

Исаия 6 - Елизаветинская Библия, 1751 bible

Исаия 6

¹И бысть в лето, в неже умре озиа царь, видех Господа седяща на престоле высоце и превознесенне, и исполнь дом славы его.

²И серафими стояху окрест его, шесть крил единому и шесть крил другому: и двема убо покрываху лица своя, двема же покрываху ноги своя и двема летаху.

³И взываху друг ко другу и глаголаху: свят, свят, свят Господь саваоф: исполнь вся земля славы его.

⁴И взяся наддверие от гласа, имже вопияху, и дом наполнися дыма.

⁵И рекох: о, окаянный аз, яко умилихся, яко человек сый и нечисты устне имый, посреде людий нечистыя устне имущих аз живу: и Царя Господа саваофа видех очима моима.

⁶И послан бысть ко мне един от серафимов, и в руце своей имяше угль горящь, егоже клещами взят от олтаря,

⁷и прикоснуся устнам моим и рече: се, прикоснуся сие устнам твоим, и отимет беззакония твоя и грехи твоя очистит.

⁸И слышах глас Господа глаголюща: кого послю, и кто пойдет к людем сим? И рекох: се, аз есмь, посли мя.

⁹И рече: иди и рцы людем сим: слухом услышите, и не уразумеете: и видяще узрите, и не увидите:

¹⁰одебеле бо сердце людий сих, и ушима своима тяжко слышаша, и очи свои смежиша, да не когда узрят очима и ушима услышат, и сердцем уразумеют и обратятся, и изцелю я.

¹¹И рекох: доколе, Господи? И рече: дондеже опустеют гради, от еже ненаселеным быти, и домы, от еже не быти человеком, и земля останется пуста.

¹²И посем продолжит Бог человеки, и умножатся оставльшиися на земли.

¹³И еще на ней есть десятина, и паки будет в расхищение якоже теревинф и яко желудь, егда испадет из плюски своея: семя свято стояние его.