Read Елизаветинская Библия, 1751 Исаия 61 Bible Online

Исаия 61 - Елизаветинская Библия, 1751 bible

Исаия 61

¹Дух Господень на мне, егоже ради помаза мя, благовестити нищым посла мя, изцелити сокрушенныя сердцем, проповедати пленником отпущение и слепым прозрение,

²нарещи лето Господне приятно и день воздаяния, утешити вся плачущыя,

³дати плачущым сиона славу вместо пепела, помазание веселия плачущым, украшение славы вместо, духа уныния: и нарекутся родове правды насаждение Господне во славу.

⁴И созиждут пустыни вечныя, запустевшыя прежде воздвигнут: и обновят грады пустыя, опустошенныя в роды.

⁵И приидут инороднии, пасущии овцы твоя, и иноплеменницы орателие и виноградарие ваши:

⁶вы же священницы Господни наречетеся, служителие Бога вашего, речется вам: крепость язык снесте и в богатстве их чудни будете.

⁷Сице землю свою вторицею наследят, и веселие вечное над главою их.

⁸Аз бо есмь Господь любяй правду и ненавидяй грабления от неправды: и дам труд их праведником и завет вечен завещаю им.

⁹И познается во языцех семя их, и внуцы их посреде людий: всяк видяй я познает я, яко сии суть семя благословено от Бога, и радостию возрадуются о Господе.

¹⁰Да возрадуется душа моя о Господе: облече бо мя в ризу спасения и одеждею веселия (одея мя): яко на жениха возложи на мя венец, и яко невесту украси мя красотою.

¹¹И яко земля растящая цвет свой, и яко вертоград семена своя прозябает: тако возрастит Господь Господь правду и веселие пред всеми языки.