Read Елизаветинская Библия, 1751 Исаия 64 Bible Online

Исаия 64 - Елизаветинская Библия, 1751 bible

Исаия 64

¹Аще отверзеши небо, трепет приимут от тебе горы и растают,

²яко тает воск от лица огня, и попалит огнь супостаты, и явлено будет имя твое в сопротивных твоих: от лица твоего языцы возмятутся:

³егда сотвориши славная, трепет приимут от тебе горы.

⁴От века не слышахом, ниже очи наши видеша Бога, разве тебе, и дела твоя, яже сотвориши ждущым милости.

⁵Милость бо срящет творящих правду, и пути твоя помянутся: се, ты разгневался еси, и мы согрешихом.

⁶Сего ради заблудихом и быхом яко нечисти вси мы, якоже порт нечистыя вся правда наша, и отпадохом яко листвие беззаконий ради наших: тако ветр восхитит нас.

⁷И несть призываяй имя твое и помянувый удержати тя: яко отвратил еси лице твое от нас и предал ны еси беззаконий ради наших.

⁸И ныне, Господи, Отец наш еси ты, мы же брение, дела руку твоею вси:

⁹не прогневайся на ны зело и не помяни во время беззаконий наших, и ныне призри, яко людие твои вси мы.

¹⁰Град святилища твоего бысть пуст, сион якоже пустыня бысть, Иерусалим на проклятие:

¹¹дом святый наш и слава, юже благословиша отцы наши, бысть огнем пожжен, и вся славная наша купно падоша.

¹²И о всех сих терпел еси, Господи, и молчал, и смирил еси ны зело.