Read Елизаветинская Библия, 1751 Исаия 65 Bible Online

Исаия 65 - Елизаветинская Библия, 1751 bible

Исаия 65

¹Явлен бых не ищущым мене, обретохся не вопрошающым о мне, рекох: се, есмь: языку, иже не призваша имене моего.

²Прострох руце мои весь день к людем не покаряющымся и противу глаголющым, иже не ходиша путем истинным, но вслед грехов своих.

³Людие сии разгневляющии мя пред лицем моим присно: тии жертвы приносят в вертоградех и кадят во чрепех бесом, иже не суть,

⁴и во гробех и во пещерах лежат соний ради, иже ядят мяса свиная и юху треб, осквернени сосуди их вси:

⁵иже глаголют: отиди от мене, не прикоснися мне, яко чист есмь. Сей дым ярости моея, огнь горит в нем вся дни.

⁶Се, написася предо мною: не умолчу, дондеже отдам в недра им грехи их и грехи отец их глаголет Господь:

⁷иже кадяху на горах и на хомех укориша мя, отдам дела их в недра им.

⁸Тако глаголет Господь: имже образом обретается ягода на грезне, и рекут: не погуби его, яко благословение есть в нем: тако сотворю служащаго ми ради, не имам всех погубити ради его:

⁹и изведу из иакова семя и из иуды, и наследит гору святую мою, и наследят избраннии мои и раби мои и вселятся тамо.

¹⁰И будут во дубраве ограды стадом, и юдоль ахорская в покоище говядов людем моим, иже взыскаша мене.

¹¹Вы же, оставившии мя и забывающии гору святую мою, и уготовлящии демону трапезу и исполняющии щастию растворение,

¹²аз предам вас под мечь, вси закланием падете: яко звах вас и не послушасте, глаголах, и преслушасте и сотвористе лукавое предо мною и яже не хотех избрасте.

¹³Сего ради тако глаголет Господь: се, работающии ми ясти будут, вы же взалчете: се, работающии ми пити будут, вы же возжаждете:

¹⁴се, работающии ми возрадуются, вы же посрамитеся: се, работающии ми возвеселятся в веселии сердца, вы же возопиете в болезни сердца вашего и от сокрушения духа восплачетеся.

¹⁵Оставите бо имя ваше в насыщение избранным моим, вас же избиет Господь: работающым же мне наречется имя новое,

¹⁶еже благословится на земли, благословят бо Бога истиннаго: и кленущиися на земли клятися будут Богом истинным, забудут бо печаль свою первую, и не взыдет им на сердце.

¹⁷Будет бо небо ново и земля нова, и не помянут прежних, ниже взыдут на сердце их,

¹⁸но радость и веселие обрящут на ней, яко се, аз творю веселие Иерусалиму и людем моим радость.

¹⁹И возвеселюся о Иерусалиме и возрадуюся о людех моих, и ксему не услышится в нем глас плача, ни глас вопля,

²⁰ниже будет тамо младенец, ни старец, иже не исполнит лет своих: будет бо юный ста лет, умираяй же грешник ста лет и проклят будет.

²¹И созиждут домы и сами вселятся, и насадят винограды и сами снедят плоды их.

²²Не созиждут, да инии вселятся, и не насадят, да инии снедят: якоже бо дние древа жизни, будут дние людий моих: дела бо трудов их обетшают.

²³Избраннии же мои не имут трудитися вотще, ниже породят чад на проклятие, яко семя благословено есть Богом, и внуцы их с ними будут.

²⁴И будет, прежде неже воззвати им, аз услышу их, еще глаголющым им, реку: что есть?

²⁵Тогда волцы и агнцы имут пастися вкупе, и лев яко вол снесть плевы, и змия землю яко хлеб: не повредят, ниже погубят на горе святей моей, глаголет Господь.