Read Елизаветинская Библия, 1751 Исаия 66 Bible Online

Исаия 66 - Елизаветинская Библия, 1751 bible

Исаия 66

¹Тако глаголет Господь: небо престол мой, земля же подножие ногу моею: кий дом созиждете ми, и кое место покоища моего?

²Вся бо сия сотвори рука моя, и сия суть вся моя, глаголет Господь. И на кого воззрю, токмо на кроткаго и молчаливаго и трепещущаго словес моих?

³Беззаконник же жряй ми телца, яко убиваяй пса: и приносяй семидал, яко кровь свиную: даяй ливан в память, аки хулник. И тии избраша пути своя, и мерзости их, яже душа их изволи.

⁴И аз изберу поругания их и грехи их воздам им: яко звах их, и не послушаша мене, глаголах, и преслушаша и сотвориша злое предо мною, и яже не хотех избраша.

⁵Услышите глагол Господень, трепещущии словесе его: рцыте, братия, ненавидящым вас и гнушающымся, да имя Господне прославится и явится во веселии их, и они посрамятся.

⁶Глас вопля от града, глас от храма, глас Господа воздающаго воздаяние сопротивящымся.

⁷Прежде неже чревоболети ей, роди, прежде неже приити труду чревоболения, избеже и породи мужеск пол.

⁸Кто слыша сицевое, и кто виде сице? аще родила земля с болезнию во един день? или и родися язык весь купно, яко поболе и роди сион дети своя?

⁹Аз же дах чаяние сие, и не помянул еси мене, рече Господь. Не се ли, аз родящую и неплодную сотворих? рече Бог твой.

¹⁰Веселися, Иерусалиме, и торжествуйте в нем, вси любящии его и живущии в нем: радуйтеся вкупе с ним радостию, вси елицы плакасте о нем,

¹¹да ссете и насытитеся от сосца утешения его, да ссавше насладитеся от входа славы его.

¹²Яко сия глаголет Господь: се, аз укланяю на ня аки реку мира, и аки поток наводняемый славу языков: дети их на рамена взяты будут и на колену утешатся.

¹³Якоже аще кого мати утешает, тако и аз утешу вы, и во Иерусалиме утешитеся

¹⁴и узрите, и возрадуется сердце ваше, и кости вашя яко трава прозябнут: и познается рука Господня боящымся его, и запретит непокаряющымся.

¹⁵Се бо, Господь яко огнь приидет, и яко буря колесницы его, воздати яростию отмщение свое и прещение во пламени огненне:

¹⁶огнем бо Господним судитися будет вся земля, и мечем его всяка плоть: мнози язвени будут от Господа.

¹⁷Очищающиися и освящающиися во вертоградех и в преддвериих ядущии мясо свиное и мерзости и мышы вкупе погибнут, рече Господь.

¹⁸И аз дела их и помышление их вем, и гряду собрати вся народы и языки, и приидут и узрят славу мою:

¹⁹и оставлю на них знамение, и послю от них спасеных во языки, во фарсис и в фуд, и в луд и в мосох, и в фовель и во елладу, и во островы дальния, иже не слышаша имене моего, ниже видеша славу мою: и возвестят славу мою во языцех,

²⁰и приведут братию вашу от всех язык дар Господеви, с коньми и колесницами и с носилами мсков, под сеньми во святый град Иерусалим, рече Господь, аки бы принесли сынове израилевы жертвы своя мне со псалмы в дом Господень:

²¹и от тех поиму себе жерцы и левиты, рече Господь.

²²Якоже бо небо ново и земля нова, яже аз творю, пребывают предо мною, глаголет Господь, тако станет семя ваше и имя ваше:

²³и будет месяц от месяца, и суббота от субботы, приидет всяка плоть поклонитися предо мною во Иерусалим, рече Господь:

²⁴и изыдут и узрят трупы человеков преступивших мне: червь бо их не скончается, и огнь их не угаснет, и будут в позор всяцей плоти.