Read Елизаветинская Библия, 1751 Исаия 9 Bible Online

Исаия 9 - Елизаветинская Библия, 1751 bible

Исаия 9

¹Сие прежде испий, скоро твори, страно завулоня и земле неффалимля, и прочии при мори живущии, и об ону страну иордана, галилеа языков.

²Людие ходящии во тме видеша свет велий: живущии во стране и сени смертней, свет возсияет на вы.

³Множайшии людие, яже извел еси, в веселии твоем: и возвеселятся пред тобою, якоже веселящиися в жатву, и якоже веселятся делящии корысти.

⁴Зане отятся ярем лежай на них, и жезл, иже на выи их: жезл бо истязующих разсыпа Господь, якоже в день, иже на мадиама.

⁵Яко всякую одежду собранну лестию и ризу с примирением отдадут, и восхотят, да быша огнем сожжены были.

⁶Яко отроча родися нам, Сын, и дадеся нам, егоже началство бысть на раме его: и нарицается имя его: велика совета ангел, чуден, советник, Бог крепкий, властелин, Князь мира, Отец будущаго века: приведу бо мир на князи, мир и здравие ему.

⁷И велие началство его, и мира его несть предела на престоле давидове и на царстве его, исправити е и заступити его в суде и правде, отныне и до века: ревность Господа саваофа сотворит сия.

⁸Смерть посла Господь на иакова, и прииде на израиля:

⁹и уразумеют вси людие ефремовы и живущии в самарии, в досаждении и высоцем сердцы глаголюще:

¹⁰плинфы падоша, но приидите, изсечем камение и посечем черничие и кедры, и созиждем себе столп.

¹¹И разрушит Бог востающыя на гору сионю, и враги его разсыплет:

¹²сирию от восток солнца и еллины от запада солнца, поядающыя израиля всеми усты. Во всех сих не отвратися ярость его, но еще рука его высока.

¹³И людие не обратишася, дондеже язвени быша, и Господа не взыскаша.

¹⁴И отят Господь от израиля главу и ошиб, велика и мала, во един день:

¹⁵старца и чудящихся лицам, сие начало: и пророка учаща беззаконная, сей ошиб.

¹⁶И будут блажащии людий сих льстяще, и льстят, яко да поглотят я.

¹⁷Сего ради о юношах их не возвеселится Господь, и сирот их и вдовиц их не помилует: яко вси беззаконнии и лукавии, и всякая уста глаголют неправду. Во всех сих не отвратися ярость его, но еще рука его высока.

¹⁸И разгорится яко огнь беззаконие, и яко троскот сухий пояден будет огнем, и разгорится в чащах дубравных и пояст, яже окрест холмов вся.

¹⁹За ярость гнева Господня сгоре вся земля, и будут людие яко огнем пожжени: человек брата своего не помилует,

²⁰но уклонится на десно, яко взалчет, и снесть от шуиих, и не насытится человек ядый плоти мышцы своея: снесть бо манассий ефремово, и ефрем манассиино, яко вкупе повоюют иуду.

²¹Во всех сих не отвратися ярость (его), но еще рука его высока.