Read Елизаветинская Библия, 1751 Левит 1 Bible Online

Левит 1 - Елизаветинская Библия, 1751 bible

Левит 1

¹И воззва Господь Моисеа, и рече ему из скинии свидения, глаголя:

²глаголи сыном израилевым, и речеши к ним: человек от вас аще принесет дары Господу, от скотов и от говяд и от овец да принесете дары вашя:

³аще всесожжение дар его, от говяд мужеск пол непорочен принесет, пред двери скинии свидения да принесет е приятно пред Господем,

⁴и да возложит руку на главу приношения, приятно ему, умилостивити о нем:

⁵и да заколют телца пред Господем: и да принесут сынове аароновы жерцы кровь, и да пролиют кровь на олтарь окрест, иже у дверий скинии свидения,

⁶и одравше всесожжение, да раздробят е на уды,

⁷и да возложат сынове аарони жерцы огнь на олтарь, и да вскладут дрова на огнь:

⁸и да вскладут сынове аарони жерцы раздробленая, и главу, и тук на дрова сущая на огни яже на олтари,

⁹утробу же и ноги да измыют водою: и да возложит жрец вся на олтарь: приношение есть жертва, воня благоухания Господу.

¹⁰Аще же от овец дар свой Господеви (принесет) от агнец и от козлищ во всесожжение, мужеск пол непорочен да принесет и,

¹¹и да возложит руку на главу его, и да заколют е в стране олтаря к северу пред Господем: и да пролиют сынове аарони жерцы кровь его на олтарь окрест:

¹²и да раздробят его на уды, и главу, и тук его, и да вскладут я жерцы на дрова сущая на огни яже на олтари,

¹³и утробу и ноги измыют водою: и принесет жрец вся, и да возложит на олтарь: приношение есть жертва, воня благоухания Господу.

¹⁴Аще же от птиц приношение принесет дар свой Господу, и принесет от горлиц или от голубов дар свой,

¹⁵и да принесет и жрец ко олтарю, и да отторгнет главу его, и да возложит жрец на олтарь и исцедит кровь у стояла олтаря:

¹⁶и да отлучит гортань с перием, и извергнет ю от олтаря на восток на место пепела:

¹⁷и да изломит его от крил, и да не разделит: и да возложит е жрец на олтарь на дрова, яже на огни: приношение есть жертва, воня благоухания Господу: